February 5, 2022: Sagaing ramthen, Kalay myone, Pyintha khua, Pyintha sianginn ah hmunhma a khuarmi SAC ralhrang phu le Pyosawhti phufonh hna cu Kalay Myone People Defense Force phu nih an lut hnawh i an dohnak caah SAC ralhrang phu le Pyosawhti phufonh lei Captain pakhat telh in a thimi an tam ngai ti si.
Cu kahdohnak ah PDF phu lei zong in pasaltha 7 nih ram le miphun caah an nunnak an pek tiah Kalay PDF nih thawngthanhnak an tuah. Nizan February 4, zan suimilam 7 hrawng ah Pyintha khua sianginn ah hmunhma a khuarmi SAC ralhrang phu le Pyosawhti phu fonh hna cu Kalay myone, People Defense Force Tatzing 6 le Tatzing 7 fonh nih,
Kut hlonh bomb in an doh hmasa hnu ah kaphnih kar naihniam ngai in kahdohnak a chuak tiah theih a si. Cu kahdohnak chungah PDF phu lei nih tha tein hmunhma a la hlan ah SAC ralhrang phu lei an kah caah Kalay PDF Tatzing 6 in Tatsuhmu 1 a nunnak a liam i, cu hnu ah pehzulh in naihniam tein kahdohnak aa peh caah,
PDF Kalay, Tatzin 6 in pasaltha 3 le Tatzing 7 in pasaltha 3 nih ram le miphun caah an nunnak an pek rih tiah Kalay PDF phu nih thawngthanhnak an tuah i a si. Pyintha sianginn pawng i kahdohnak ahhin kaphnih kar i cawlhlulh a si i, SAC ralhrang lei in Captain pakhat cu naihniam tein hmuh a si i an kahthatnak kong,
Kahdohnak chung ah SAC ralhrang phu le Pyosawhti phu fonh lei in 12 an thi i, tampi nih hliamhma an tuarnak kong an thangthanhnak ah an langhter chih fawn. A thimi PDF pasaltha hna ruak cu tuzing ah Pyintha sianginn ah an chiah i khuami cu hnek chih in an zohter i, “PDF hna nih an rak kan doh caah kan thah hna” tiah,
SAC ralhrang lei nih chimhfiannak kan tuah ti phun in khuami cu an chimh len hna ti si. Nizan kahdohnak ahhin Kalay khuapi chung lei nih zanlei suimilam 7 in zinglei suimilam 4 tiang hriamnam ngan in an kah ve hna tiah theih a si. Pyosawhti hna cu Taungu, Pyintha lei hrawnghrang ah an lawr ngai hna tiah Voice of Kaly zong nih a rak tar langh bal cang ti si. Ref: Voice of Kalay
Leave a Reply