A poi bak, Thailand ah athlithup in luh ai timmi kawlram mi hna cu tlaih an si

Myanmar in Thailand ramchungah a thlithup in a lutmi minung 40 renglo cu April 19, zaan ah tlaih an si. An lut ahhin hmun 2 ah an luh caah an tlaihmi hna hi minung 46 renglo an si tiah theih a si.

Thailand ramchung ah Covid-19 zawtnak a hung karh ve caah ramri cu chun zaan in kilven a si. Myanmar in Thailand ramchung Chin Zai, Phupha leiin a lutmi minung 29 cu nizaan ah an tlaih bak hna. A thlithup tein Thailand ramchung an luh hnuah Thailand ramchung mawṭaw in khuapi lei panh in an kal an timh lioah an tlaih hna hi a si.

A dang minung 17 hna cu Chin Zai, Me Sai leiah tlaih an si hna. Annih zong minung 29 an tlaihning hna ṭhiamṭhiam in mawṭaw in an kal cuahmah lioah an tlaih ve hna. Tutan i an tlaihmi hna hi Shan ramkulh Lee Chaung, Tuangkyi, Maing Phan leiin a rami an si i passport ngei lon rianṭuan a timmi an si.

Tlaihmi minung hna cu Covid-19 zawtnak an ngeih le ngeih lo check hmasat an si lai i cu hnuah phungning tein hremnak peek an si lai tiah Thailand thawngzamhnak nih cun a taarlangh. Thailand ramchungah a thlithup luh aa timi Myanmarmi an tlaihmi hna a tam ngaingai cang.

Rampi buai ruangah rianṭuan awk lo i pawcawmnak caah lungrethei in a thlithup Thailand ram ah luh i rian a ṭuanmi zong an tampi hna. Passport ngeimi ca zongah a tulio dirhmun ahcun Thailand luh a har ngaingai ti a si. Ramri biatak tein an ven caah luh ahar ngaingai ti a si.