February 6, 2022: Pago ramthen, Kyohpinkauk myone, Saigaung khua ah Maung Phyo Kyaw Han cu a phone chung facebook profile hmanthlak a tarmi cu SAC ralhrang phu nih an chek i an hmuh caah a hnu lei in an kah that tiah khuami hna sin in theih a si. Thil sining cu, Pago ramthen, Kyohpinkauk myone, Saigaung khuami Maung Phyoe Kyaw Han le Maung Shai Wanna Htete hna pahnih cu,
Nizan February 5 ni, zanlei sang ah an khua nichuak lei ah a ummi Nyaungpin aing khua ah a hawipa thitumh puai sawmnak ca pek ding in an kal ti si. Cu ti cun lampi ah ralhrang phu nih an dirhter i an chek tikah Maung Phyo Kyaw Han phone chung i a faaceobook ah NUG Profile a tarmi an hmuh caah SAC ralhrang phu nih an kah that tiah theih a si.
“An hawipi thitumhnak puai caah sawmnak ca pek ding in an kal i zanlei suimilam 4:30 pm hrawngah SAC ralhrang phu he an i ton tikah, anmah cu kan in chek hna lai tiah an dirhter i, pakhat (Maung Shine Wanna) cu khua chung lei ah a zam i a tli. A dang pakhat (Maung Phyoe Kyaw Han) cu ralhrang phu nih an chek. Chek a tongmi pa a phone cu,
A facebook lei an lut i a facebook Profile hmanthlak ah NUG Profile a thlenmi an hmuh. Cu ti cun, Ralhrang pawl nih a phone cu an i lak i, ‘A ngah cang, kal cang’ tiah an kalter hmasa riangmang i a hnulei in meithal in an kah that” tiah thil sining a theihtu khuami pakhat nih a chim hi a si. A zammi Maung Shine Wanna zong hi Nyaungpin aing khuami ah a lut i,
Aa thupnak lio an khuabawi pa nih a tlaih i ralhrang kut ah a ap hna caah ralhrang nih an velh an hrem i an chek ve tiah theih a si. “Tlaih a tongmi pa hi atu anupi naupawimi a si i atu fa a ngei deng cang. Ralhrang nih an kahthatmi pa hi kum 21, tlangval note a si” tiah, Khuami pakhat nih Yangon Khit Thit Media ah a chim chap.
Atu hi kah that a tongmi Maung Phyoe Kyaw Han ruak cu tuzan lei ah a chungkhar sin kan pek lai tiah ralhrang lei nih an chim ti si. Hmanthlak tar chihmi i ralhrang nih an kah thatmi pa a facebook ah NUG Profile aa tarmi pa Maung Phyoe Kyaw Han hmanthlak cu a si. Facebook profile hmanthlak ruangah a thancho liomi tlangval no tete tiang thah cu a poi ti hlei in chim ding khi a um ti lo e. Ref: KTM
Leave a Reply