Kalay le Laitlang pehtlaihnak lam thluang ah kahdohnak fah a chuak i SAC ralhrang phu lei a thimi an tam i Chin ralkap phu lei in minung 7 nih hliamhma an tuar tiah theih a si. Sagaing ramthen, Kalay myo le Chin ramkulh lei pehtlaihnak motor lamtluang ah kahdohnak fah a chuak i, cu kahdohnak ah SAC ralhrang phu lei in a thimi an tam I,
Chin ramkap phu fonh lei in minung 7 nih hliamhma an tuar tiah PDF Zoland nih thawngthanhnak an tuah tiah The Ladies News nih a tarlangh. January 13 zing thok in nihin tiang Kalay myo in Laitlang lei kalnak motor lam thluang ah nithum chung Chin ralkap phu fonh hna le SAC ralhrang phu hna kar kahdohnak fah a chuak i SAC ralhrang phu lei tampi an thi tiah theih a si.
Nihin hmanh ah SAC ralhrang phu nih Kalay University kulh chung in Chin ramkulh lei ah hriamnam ngan in an kah i, vanlawng 2 bomb an thlak rih hna pinah kahdohnak zong a fah rih ko tiah theih a si. Cu kahdohnak ah Chin ralkap phu fonh lei in minung 7 nih hliamhma an tuar i minung 4 hi an hliamhma a zualhma ngai.
Kahdohnak zong pehzulh in a um rih tiah PDF Zoland nih thawngthanhnak an tuahmi ah an langhter chih hi a si. Nihin Chin ramkulh ah SAC ralhrang phu a dohtu Chin ralkap phu fonh hna cu PDF Zoland, CDM – Siyin, PDA, CNDF, CNA hna an si i, a rauh hlan ah Zomi – PDF le Kalay – PDF phu zong nih an rak kan bawmh lai tiah an langhter chih fawn.
January 13 ni, chun suimilam 2 hrawng zong ah Htayzan khua pawng ah kahdohnak a chuak i SAC ralhrang phu lei in miung 7 an thi i, Htayzan khua i cozah ngeihmi coffee dum hmai vuanthan pawl inn 3 le godown 1 cu SAC ralhrang phu nih mei an khangh i an hrawk hna tiah theih a si. Cozah vuanthan pawl inn uico ralhrang nih mei an khanghmi cu,
Khuami inn ah an ruah caah an khanghmi maw, asiloah, Local PDF pawl thangchiat an duh caah maw timi fehter khawh a si rih lo tiah KTM nih a tarlangh ve. Tu kar cu Chin ramkulh chung kahdohnak a zual hma ngai. Hmun tampi ah kahdohnak a chuak hi a si. Ref: The Ladies News, KTM
Leave a Reply