A lungrawk cangmi SAC ralhrang phu hna cu 2022 kum chung ah an caan a dih cang lai tiah pension a la cangmi ralkap bawi pakhat nih a chim. Tu kar hrawng i SAC ralhrang lei nih an thazaang dih um chuak in ral an dohmi a si, tu lio dirhmun bantukin mipi ralkap lei an thazaang a thawng peng ko ahcun a tla thluahmahmi SAC ralhrang muihmel kan hmuh te lai tiah a chim hi a si.
“Thih par a par kan ti lai maw? An thih lai ah a um chun thazaang dihlak chuak in an langhter. Sual ngeilo mipi mei an khangh. Loikaw bantuk khuapi hna zong vanlawng in an kah. Miakpi in a kah. Kathar lei zong khuate lak ah vanlawng in bomb an vorh. Cu vialte an thazaang dihlak chuak in mipi ralkap an ki kiak seh ti an doh mi a si.
Local mipi ralkap phu lei in hnu an tolh piakmi cheukhat a um nain a thimi an tlawm. An tlu lo. An thinlung thazaang a thawng. Cu vialte cu Min Aung Hlaing tlaknak lam lawng te an si dih ko” tiah a chim hi a si. Atu hi SAC ralhrang phu nih Karen, Karenni, Chin, Kachin le Sagaing hna ah minung thazaang tampi le hriamnam thazaang tampi he ral an doh nain a thimi cazin ah,
SAC ralhrang lei in zuamcawhtu um loin an thimi cazin an tammi theih a si. “SAC ralhrang phu nih mipi umnak hmun hmuitinh in ral an doh i, cu hmunhma kan lak ti phun an hmunhma an kauhter. Cu ti ral an doh nain khuapi chung zong a dai hlei lo tikah a ummi minung (ralkap) dihlak a hmang dih hna.”
“A ralkap niambik pawl zong an raldohnak kip ah an thi lengmang tikah an lung rawk cang. Min Aung Hlaing zumh khawh lonak ruahnak nih a karh chinchin ve. Thawngpang thup khawh a si lo tikah Min Aung Hlaing cu zei ram hmanh nih an cohlan lo timi anmah ralkap chung lila nih an theih dih cang” tiah amah nih a chim chih.
Nihin an ralkap a thimi cazin ruangah an lung rawk cang mi ralkap chung dirhmun cu an thinlung fek ding in a hnem khotu bia zeihmanh a um ti lo ti zong in a chim chih. “A ei din (zeih-khah) chap ding zong a um ti lo. Teinak puai zong a um bal lo. Zeiruangah ral kan doh timi biahalnak zong sullam a ngeimi lehnak biafang a um ti lo. Rank niam deuh ralkap hna caah an covo cu,
Mipi hna ngeihmi inn in thilri dihlak lak, mah nih lak khawhmi mah nih co ti lawng si cang” tiah a cung mipa nih a chim chih. Tlangcungmi umnak hmun ah raldohnak an tuah than khawh ahcun Min Aung Hlaing a hnubik caan a nai chinchin lai tiah amah nih a ruahnak a chim chih. Ref: DNA
Leave a Reply