A Tu Lio A Linsa Ngaimi Australia Cozah Le Tennis Minthang Djokovic Buainak: Kum chiar te tuah tawnmi Grand Slam tennis tuk zuamnak Australia Open 2022 cu Melbourne Park ah January 17 – 30 an tuah than cang lai. Asinain vawlei cung Tennis minthang World No. 1 asimi le 2021 zong ah Australia Open Champion a rak latu Djokovic cu tuk lai ni khat te aa duh ah Australia ram in thawl a tong.
Champion ka runven lai tiah chunmang a manhmi cu khuasik mang ah aa chuah ai. Navak Djokovic cu January 5, 2022 ah Australia a rak phan. Asinain Airport ah Australia ramri vengtu (ABF: Australian Border Force) nih an tlaih i refugee pawl an chiahnak hna camp (hotel) ah an chiah ve. An tlaihnak a ruang cu Covid-19 raikham sii (Vaccine) aa chunh lo ruangah asi.
January 10 ah biaceihnak zung nih Djokovic duhnak lei hoih in camp in chuah than ding le a visa zong nunter than ding in bia an chah. Asinain Cozah lei an lung a tling thiamthiam lo i January 14 ah Australia cozah Immigration Minister nih a nawlngeihnak hmang in Djokovic visa cu a phiatpiak than. Djokovic nih asining zohpiak than ding in zangfah nawlnak a tuahmi,
Cu biaceih zung (Federal Court of Australia) i biaceih bawi minung pathum nih an cohlang lo. Cucaah January 16 ah Australia in an thawl (an kuat). Hi ruangah kum thum chung Australia zong luh khawh ti lo a fawi te. Zeikom si ah ram pakhat nih zulh ding phung le lam an sermi cu upat ding le zulh ding a rak si ko.
Vawlei cung minthang an si zong ah zulh phung tang ah a um dihmi an si hna Kawl ralkap dah ti lo cu. Zeikhom si rih ah Djokovic cu a um ti lai lo caah a hodah Champion thar asi te la cu. Federer le aa ngol than hoi i: Nadal si te dawh. Credit: Ceumi Lian
Leave a Reply