Afghanistan khua i a nganbik pahnihnak Kandahar khuapi cu Taliban nih an lak

Taliban pawl nih Afghanistan i khuapi a nganbik pahnihnak Kandahar khuapi cu August 13 ah an uk cang.

Taliban chimnak nawl ngeitu Zabihullah Mujahideen nih Kandahar khuapi i cozah zung hna tiah ruahmi inn hna an tlakmi video cu Htuihtha mipi hmaiah an langhter i palek bawi zung le khua chung ah a biapi deuh hmun hna ah ral hna cu an thianh hna i Mujahideen uknak tangah a phan tiah a chim.

Afghanistan ralkap cheukhat hriamnam chiah in cheukhat cu an tlik leng ah hriamnam za leng hrawng le mawtaw, Khe – Yem meihol hna an ngah than cang tiah a chim.

Taliban pawl tamtuk in an thancho ruangah America ram nih Afghanistan um amah miphun hna cu a rannak in an chuahtak nak ding ah forhfial an si.

America Tanzung ah American miphun hna cu a si khawh chung in vanlawng cu hmang in Afghanistan in a rannak in chuah khawh nak ding ah a forhfial nak le ralrin pek nak cu Website ah a langhter.

Security sining hna le riantuan an zor ruangah Afghanistan um America rammi hna cu bawmh ding in Tanzung i thazaang hna cu Kabur khuapi chung hman ah rikhiah nak a um ti zong in ralrin pek nak ah a langhter.

The Chin Post