Afghanistan UN Zung Rocket In An Kah I Palek Pakhat A Nunnak A Liam

Afghanistan UN Zung Rocket In An Kah I Palek Pakhat A Nunnak A Liam Nizaan July 30 ah Afghanistan ram Herat khuapi ah a ummi UN zung innkulh cung rocket le meithal in an kah ruangah palek pakhat a nunnak a liam, mi cheukhat hliamhma an pu tiah UN nih a chim.

UN zung a si tiah chinchiahnak fiang tein a um ko mi zung cu Afghan cozah a dohtu hna nih an kah mi hi a si.Afghan palek pakhat a nunnak a liam, hliamhma a pu mi zong an um.

Atu bantukin Herat khuapi cu UN riantuan hna an kah ruangah Afghanistan ah a ummi UN zung nih fak piin sual kan phawt tiah chimhnak nawlngeitu Eri Kaneko nih thawngla tu hna sin ah a chim.

UN General Secretary i Afghanistan hrambunh UN bawmhnak lei rian ngeitu Deborah Lyons nih; ngaichiat awk thil a si tiin fak piin sual a phawt pin ah a thi mi palek chungkhar hna ka ngaichiat pi, hma a pu mi hna zong an dam zokzik nak lai kan duh pi hna tiah a chim.

UN inn le riantuan hna target i tuk mi hi vawleicung upadi nih a kham mi a si caah sualnak (crime) a si kho men tiah UN cachuah nih ralrinnak a pek.

Hi kong he pehtlai in Taliban chimnak nawlngeitu Zabiullah Mujahid nih Herat khuapi i UN zung cungah thihphaihnak zeihmanh kan tuah lo, pawngkam kahdohnak ruangah an khen sual mi a si lai.Taliban pawl kan phanh hnuah zeihmanh phan ding a um ti lo tiin Twitter in a thanh.Herat khuapi ah kan hnu July 28 ni hrawngin kahdohnak a um tiah theih a si.

The Chin Post