An Bawlung Puai A Rawk Pinah Minung 1 A Thi I 6 Nih Hliamhma An Pu

An Bawlung Puai A Rawk Pinah Minung 1 A Thi I 6 Nih Hliamhma An Pu: Thayet Chaung Myone, Pedeh khua ah SAC ralhrang kut tang ah ummi Pyosawhti phu nih tuahmi bawlung puai onnak puai an tuah lio ah hriamnam ngan in kah an tong i an puai a rawk pinah 1 a thi i a dang 6 nih hliamhma an pu tiah theih a si.

Thil sining cu Tanithari ramthen, Htawai District, Thayet Chaung myone, Pedet khua ah nihin February 2 ni, chun hnu ah Local Pyithut Sit phu nih an tuahmi bawlung puai ah hriamnam ngan kah an tong i an puai a hrawk pinah A-toh a zuarmi minu pakhat a thi i a dang minung 6  nih hliamhma an pu tiah khuami hna sin in theih a si.

“Cu khua cu SAC ralhrang a thohkhanmi khua, an khua ning in a hring lawngte an si dih. Nihin ah bawlung puai onnak puai an tuah i hriamnam ngan in kah an tong caah an puai a rawk. A-toh a zuarmi minu pakhat a thi. Pyosawhti hruaitu Nyan Hla hi a kut a hliam. Bawlung puai a zohtu an dihlak an zam dih. Atu Pedet khua ah ralhrang an phan cang” tiah khuami pakhat nih Yangon Khit Thit Media ah a chim hi a si.

“Pyithut Sit phu pawl nih bawlung puai an tuah. Onnak puai ah bawlung aa chuih dingmi team pawl certual chung an lut lio ah kah an tong. A caan hi chun hnu suimilam 2 le 2:30 kar lak hrawng a si lai. Hriamnam ngan in kah an tongmi a si lai kan zumh. Hriamnam ngan kuan hi certual in khat lei lam ah a tla. Minung pakhat a thi, a dang 6 nih hliamhma an tuar” tiah Pedet khuami pakhat nih a chim.

Cu thil cang cu M79 in voi hnih an kah hi a si, pakhat cu a-toh a zuarmi nu dawr pawngah a tla i a puak. A dang pakhatcu Ohchohzihmu zung pawng ah a puak ti a si i, a kah tu hi aho te phu an si timi theih a si rih lo tiah Khit Thit Media nih a tarlangh hi a si. Ref: KTM