An Thah Ko Mi Cu Amah Le Amah Aa Thah An Ti

Yangon ramthen ah SAC ralhrang phu nih khualtlung cazinkan chek lai an ti i U Hla Min a tlaih i biahalnak an tuahnak ah an thah, a chungle sinah amah le amah aa thah tiah a ruak hmanh a chungle sin pek duh loin SAC ralhrang nih an vui tiah theih a si. Thil sining cu Yangon ramthen, Tamwe myone, Ayokung sang, Honey kung hteik, Aung Su Chue Theinkan Taik ah a ummi,

Kum 45 upa U Hla Min Thein cu SAC ralhrang hu nih an tlaih i biahalnak an tuahnak ah a thah tiah theih a si. January 1 ni zan suimilam 10:30 pm hrawng ah Tamwe myone Ayokung sang, Honey Kung Hteik, Aung Su Chue Theinkan Taik ah U Hla Min Thein cu SAC ralhrang phu nih a umnak ah an rak tlaih i nizan January 3 ni ahcun amah le amah aa thah i a thi tiah,

A chunglei sin thawngthanhnak an tuah. Cun nihin January 4 ni ah SAC ralhrang phu a ruak an vui i a chungkhar minung 4 lawng ruak vuinak ah kalnak nawl an pek hna tiah theih a si. “Ko Hla Min Thein hi January 1 zan ah an rak tlaih. Ni 3 ni ah amah le amah aa thah tiah a chungle sin theihternak an tuah. Nihin cu a ruak an vui i a chungkhar minung 4 lawng,

Ruak vuinak ah kalnak nawl an pek. Hmanthlak lo ding an ti. Ahmai zohnak nawl zong an pe lo. Ralkap nih an thahmi a si ko. Zeiruangah amah le amah cu aa that lai? Hi hi SAC ralhrang nih an thah i a dik lomi thawngpang an tuahmi aho paoh nih theihmi a si ko” tiah a thimi hawipa pakhat nih a chim. U Hla Min Thein cu midai pakhat a si i zeiruangah,

SAC ralhrang nih an tlaih i an thah timi theih a si rih lo tiah a sang ah a ummi hna nih an chim. “Mi dai a si i amah tein a ummi a si. Hi bantuk minung pakhat fawi tein an thahmi hi cu zeiti hmanh ngaihthiam khawh an si lo. Hi ralkap hna mipi nih an cohlan khawhlonak cu hi bantuk ruang ahhin a si” tiah a sang minung pakhat nih a chim ve. Ref: KTM

Be the first to comment

Leave a Reply

Your email address will not be published.


*