Assam Nih Mizoram Ramri Ah Police Commando Battalion 3 Chiah A Timh July 26 ah ramri buainak ruangah Assam le Mizoram palek i kahnak ah Assam palek 6 an thih hnu ah Assam chief minister Himantha Biswa Sarma nih Mizoram ramri Cachar, Karimganj le Hailakand ah police commando battalion 3 kan chiah lai tiah a chim.
Assam CM nih “mah kan ramri hi mi khuasak nak hmun a si lo mi, reserved forest kong a si. Kan ram cu lehmah pakhat hmanh sungh kan duh lo.Mah reserved forest ah hin a hohmanh khuasak ter kan duh lo.Mizoram nih an ramchung a si ti an fian khawh lo ahcun mah area chung a um mi hna cu an chuahter colh hna lai tiah a chim.
Mizoram le Assam ramri buainak hi hlanpi Congress cozah chan in a rak um cang mi a si i,hi buainak hi party buainak a si lo, state pa 2 kar buainak a si caah ramri buainak cu supreme court ah ka phanhpi lai tiah Assam CM nih a chim.
July 26 buainak ruangah a thi mi hna cu Assam cozah nih ni 3 chung sunnak a ngeih lai pin ah mi thi hna cu sing 50 cio le hliamhma a pu mi hna sin ah sing 1 cio cozah nih a pek hna lai.
Mizoram le Assam ramri buainak kong he pehtlaih i Congress party nih chungtel 7 um nak Committee a dirh colh ve i,mah Committee nih zohfelnak an ngeih hnu ah an party president Sonia Gandhi sin ah report an pek lai.
The Chin Post
Leave a Reply