BREAKING: CDF Phu Nih Kum 18 In Kum 40 Kar Chin Mino Dihlak Forhfialnak An Tuah

Chin ramkulh chung mino hna cu ramleng chuak loin dohthlennak ah tel cio ding in CDF phu nih forhfialnak an tuah. Chin ramkulh chung ah a ummi kum 18 in kum 40 kar, mino vialte nih Chin ramkulh chuak tak in, ramleng kal, dohthlennak hnuchirh lo ding in CDF – Kanpetlet phu nih nihin January 30 ni ah cathanh chuak in forhfialnak an tuah hi a si.

SAC ralhrang phu nih uknak hramhram in an lak hnu ah Chin ramkulh cu an ngeihmi hriamnam i lak in ralhrang an doh i, SAC ralhrang phu zong nih tlangcung mi hna biatak tein dohnak a tuah ve hna.

Cucaah Chin ramkulh chung ah a ummi kum 18 in kum 40 kar, mino hna le kum upa tuk rih lomi pawl nih Chin ramkulh chuak tak riangmang in ramleng chuak lo ding le tutan dohthlennak hnu chirh lo ding in CDF (Kanpetlet) nih cathanh chuah in forhfialnak an tuah hi a si.

Myanmar ram pumpalulh Federal Democracy kan hmuh khawhnak ding le Chin miphun hna zong nih mah tein khuakhan lairelnak le tlukruannak kan ngah ve khawhnak hnga, SAC ralhrang phu hi a hram in hloh kan i timh lio ah hmaile kan Chin ram serchuahnak ah pumkhat tein itel cio ding in CDF Kanpetlet nih forhfialnak cathanh an chuahmi ah an langhter chih hi a si.

An Cathanh Chuahmi Cu A Tanglei Bantukin A Si: 1nak. SAC ralhrang phu nih 2021 kum, February 1 ni ah Myanmar rampi nawlngeihnak hramhram in an lak. 2nak. Cu nawlngeihnak an lak hnu ah rampumpi vuanthan hna nih Civil Disobedience Movement (CDM) an tuah, mipi vialte zong nih lam zawh in duhlonak langhter a si i, ngeihmi hriamnam in dohnak tiang a phak.

3nak. Atu cu SAC ralhrang phu hna nih kanmah Chin ramkulh telh in tlangcungmi hna cu an kan doh i, pehzulh in kahdohnak fah a chuak. 4nak. Cucaah Chin ramkulh ah a ummi kum 18 in kum 40 kar, mino hna le kum upa tuk rih lomi dihlak in kannu Chin ramkulh chuah tak in ramleng chuak, Dohthlennak hnu chirh tibantuk ruah loin nawlpat le forhfial kan in duh hna.

5nak. Federal Democracy ngah khawhnak, mahte in khuakhan lairel khawhnak le tlukruannak kan ngah khawhnak caah SAC ralhrang phu an hram in hloh dih in hmailei Chin ram kan ser khawhnak hnga hmunkhat tein tuanti tanti cio hna usih tiah forhfial kan in duh hna. Chin Defense Force – Kanpetlet. Laknak: Delta News Agency