BREAKING: Kalay University Cu Hriamnam Ngan Miakpi Chiahnak Ah An Hman Cang

Kalay University Cu Hriamnam Ngan Miakpi Chiahnak Ah An Hman Cang: Hriamnam ngan Miakpi hnuk in SAC ralhrang motor 3 cu Kalay University kulh chung an lut tiah Zalem media nih a tarlangh. SAC ralhrang motor ngan 2 le ralhrang motor hme pakhat, an dik lak ralhrang motor 3 hna cu lamhla kah khawhmi hriamnam ngan Miakpi hnuk in Kalay University kulh chung ah an lut tiah theih a si.

Atu Kalay University ah lam hla kah khawhmi hriamnam ngan miakpi 3 a um cang tiah Zalen nih a tarlangh. Cu hriamnam ngan pawl cu Kalay University sianginn kulh chung i Bandulah Asawng pawng ah an chiah ko tiah theih a si. Cu ka hmun in Chin ramkulh lei an duh duh in an hung kah lai tinak a si. Fim cawnnak University pi cu mithahnak hriamnam chiahnak le mithahtu ralhrang umnak hmun ah aa cang ko cang.

Kalay myo ahcun nihin tiang, a ni 347 nak lam zawh in ralhrang uknak duhlonak an langhter peng ko rih ko. Kalay myo hi Kawlram chung ah hriamnam in SAC ralhrang a doh hmasa tu an si i, Kalay myo in pasaltha le nusaltha tampi zong ram le miphun caah an nunnak an pek ve. Nihin tiang raltha ngai i lam zawh in duhlonak a langhter ngamtu khua an si. Ref: Zalen

Thawngpangdang: Gangaw myone, Sanmyo khua cu an khua ningpi deng in mei an khangh cang. Magwe ramthen, Gangaw myone, Sanmyo khua cu SAC ralhrang phu le Pyosawhti phu nih January 18 ni ah an lut hnawh i, mei an khangh caah nihin tiang ah inn 132 mei in a ciam dih cang tiah Gangaw myone People Defense Force phu nih nihin ah thawngthanhnak an tuah hi a si.

Cucaah khuami tampi hna cu an khua an inn le lo chuak tak in an himnak hmun ah zam hna ti si. cu pinah 2021 kum, December 21 ni zong ah SAC ralhrang phu le Pyosawhti phu nih Sanmyo khuami inn 28 an rak khangh piak bal cang hna. Atu Sanmyo khua cu SAC ralhrang phu le Pyosawhti phu hna nih mei an khangh caah.

Inn 160 a ciam dih cang i, khua chung in a kang rih lomi inn 32 lawng a tang cang tiah theih a si. Gangaw myone, Sanmyo khuami caah bawmhnak pek a duhmi nih Telegram +959791941009 le Signal +959791941009 ah pehtlaihnak tuah in bawmhnak pek khawh a si. Bawmhnak a pe khomi nih pek khawh i zuam cio usih. Ref: Zalen