BREAKING: Lakphak Ti A Dinnak Cabuai Ah A Va Thu Ve I A Kah That

Yangon, Taketa myone ah SAC ralhrang nih rian khinhmi Za-inn-hmu (khuabawi) pakhat cu lakphakti a sin lio ah aho ti theih lomi hriamtlai pakhat nih a cabuai ah a va thu hnawh ve i a kah thah tiah theih a si.  Nihin January 14 ni, zinglei sang ah Thaketa myone, 13 sang khuabawi U Hla Thwin, ralkap nih rian an khinhmi pa cu lam pawng dawr ah a thu i lakphakti a din lio ah,

Aho ti theih lomi hriamtlai pakhat a phan i, a cabuai ah a thu ve riangmang i a cal ah meithal in voi 2 a kah tiah theih a si. “Lakphakti a din lio ah a cabuai cung a thu ve i voi 2 a kah” tiah Thaketa ah khuasami pakhat nih a chim. Kah that a tongmi khuabawipa cu a hliamhma he siizung ah an tlikpi nain lam tamtim ah a nunnak a liam tiah theih a si. Ref: DNA

Thawngpangdang: Yinmapin peng chung ah nitin ralkap vanlawng aa hel: Sagaing ramthen, Yinmapin myone chung khuate hna cu raltuknak vanlawng nih nihin a hel i a thihphaih hna tiah Yinmapin myone chung ah ummi activist pakhat nih a chim. SAC ralhrang phu cu Yinmapin le Pale myone chung khuate cheukhat cu hriamnam ngan in an kah hna pinah,

Raltuknak vanlawng le helicopter tiang in an kah hna tiah theih a si. “Nizan chun ruangah Yinmapin le Pale ramri ah ummi Puhtothar khua cu vanlawng in an kah. Tu kar hrawng cu khuate hna cung ah vanlawng in an ihel i an kan thihphaih” tiah a chim hi a si. Atu hi Puhtothar khua hrawngah, khuate 5 hna ah SAC ralhrang pawl nih,

Hriamnam ngan in vanlawng cung in an kah caah khuami an dihlak in an zam dih hna tiah theih a si. “Kanmah Yinmapin motor lam pawng a ummi khuate mi hna zong kan hnu lei in an dihlak an zam dih hna. Atu cu tam nawn nih khua chung an lut than tikah ralzam hi 100 hrawng lawng an tang lai. A cheu ralzam hna cu khua an kir khawhlonak thla 2 deng a si cang.”

“An zamnak hmun cu an pawngkam khuate, an him lai tiah an ruahnak khua ah an zam hna. An zamhnak khuami hna nih an cawm hna. Cun kanmah Mipi Bawmhchanhtu phu zong nih facang, chiti le meh chum ding tete an bawmh ve hna” tiah a chim chih. SAC ralhrang pawl bomb puah hnawh an sinak area he aa naihnak khuate hna cu mei an khangh tawn hna i,

January 9 ni ah Kyesa khua cu SAC ralhrang phu nih mei an khangh hna i an hrawk hna. “Tu kar hrawng mei an khanghmi khua hi Lengauk khua le Kyesa khua an si. Khua chung an lut i khuami thilri an chuh hna. An duh lomi an hrawk hna. Khua pawng ah bomb puah hnawh an si ahcun cu khua cu mei an khangh. Cucu uico ralhrang pawl an zia a si” tiah a cung mipa nih a chim chih hi a si. Ref: DNA