BREAKING: Lay Kay Kaw A Phanmi SAC Ralhrang 200 Hrawng Cu Ruah Lo Pi In An Kir Dih Than

Myawaddy myone, Lay Kay Kaw area chung a phanmi Tatma 44 kuttang ummi SAC ralhrang 200 hrawng cu tu zing ah ruahlo piin an kir than dih tiah theih a si. 2021 kum, December thla lai hrawng in Lay Kay Kaw area chung raldoh ding in a rak lutmi, Thahtun myo hrambunh Tatma 44 kuttang um ralhrang phu hna an kir than dihmi a si i,

Lay Kay Kaw ah a um tawnmi pawl cu an um rih ko hna tiah Lay Kay Kaw myothit Ohchohzi chungtel pakhat nih a chim. “Lay Kay Kaw ah raldoh ding in a phanmi pawl a kir than. Hi ka a um ciami Khalayah 560 le 556 hna cu an tang ko” tiah a cung mipa nih a chim hi a si. Atu hi Lay Kay Kaw area chung ah SAC ralhrang 100 hrawng lawng an tang cang tiah a cung mipa nih a chim chih.

“Cu ti an kir than lai timi thawng kan theihnak hi ni 3, ni 3 hrawng a si cang” tiah a chim chih. Ruahlo piin an thazaang an tumtermi a ruang theih a si rih lo tiah amah nih a chim chap. SAC ralhrang phu hna nih sakhan hmun an khuarnak Lay Kay Kaw myothit, Mewakhi le Pahikalaw khuami ralzam hna cu Phalulay ralzam sakhan, Kyaukkhe khua le Thehbawboe khua lei ah,

An um rih ko tiah theih a si. “Anmah (SAC ralhrang phu) lei nih ralzam pawl rak kir than ding in zeihmanh an chimmi a um rih lo” tiah amah nih a chim nolh. SAC ralhrang phu le KNU kar hnatlaknak pakhatkhat an tuaha ruangah SAC ralhrang phu nih an thazaang an tumtermi a si hnga maw timi fehter khawh a si rih lo tiah Delta News Agency nih a tarlangh hi a si.

Hi ralkap thazaang zuknak kong he pehtlaih in mipakhat nih cun Sagaing le Chin ramkulh lei an kuat duh i a si men lai. Hi hna (SAC ralhrang phu) hi an thazaang a tlawm cang tikah ral a daih deuhnak lei kha thazaang thumh in ral a tam deuhnak lei thazaang chap dawh an si tiah a ruahnak comment a tial ve. Ref: DNA