BREAKING: Motor Cung Bomb Puak Ruangah Minung 4 An Thi

Yangon ramthen, Insein myoe, Ywathit pawng ah nihin zinglei suimial 6 hrawng ah bomb a puah i, minung 4 an thi tiah khuami hna nih an chim. Khit Thit Media nih a tarlangh. “Motor cung ah bomb an puah. A thimi hi aho te an si timi cu kan thei ve rih lo. Nihin February 1 ni, zinglei suimilam 6 am hrawng ah a puak. Insein, Ywathit pawng ah a puak.”

“Thil sining dikthlir cu kan thei ve rih lo” tiah khuami pakhat nih a chim hi a si. Cu bomb a puak timi thawngpang cu a dikmi thawngpang a si nain fian tein kan thei ko ve rih lo tiah Insein myone uktu phu cheukhat sin in theih a si. Nihin cu Yangon khualipi hmunhma tampi ah bomb a puak tiah Kawl Media hna nih an langhter cio hna. Ref: KTM

Thawngpangdang: Monywa Kanthayar pawng SAC ralhrang phu sakhan gate cu PDF phu nih bomb an puah hnawh i ralhrang 3 an thi. Sagaing ramthen, Monywa ah nihin February 1 ni, zinglei sang ah mizapi nih Silent Strike an tuah cuahmah lio caan ah Kanidaung myoset, Dictator People’s Revolution, Golden Triangle People’s Defense Force pho fonh hna nih,

SAC ralhrang Gate sakhan pakhat bomb an puah hnawhmi a si tiah Golden Triangle People’s Defense Force phu sin in theih a si. Monywa 1982 rawl dawr pawng ah SAC ralhrang phu chek gate cu mipi ralkap Allied Forces phu fonh nih an doh tiah Golden Triangle People’s Defense Force in tuanvo ngeitu pakhat nih Monywa Chindwin Yoma News Agency ah a chim.

“Monywa ah khuapi kherhhlainak a tuah. Allied Forces phu an i fonh i, 1982 Rawl dawr pawng ah midang Silent Strike an tuah cuahmah lio ah  SAC ralhrang pawl cu bomb an puah hnawh. Uico ralhrang 3, a hmun ah an thi ti in kan theih” tiah a chim hi a si.

Monywa khuapi ahcun ralhrang nih hramhram in nawlngeihnak a lak kum 1 tlinnak ni ah Silent Strike an tuah lio ah PDF phufonh nih bomb an puah hnawh i ralhrang 3 an thi hi a si. Nihin cu Yangon khualipi chung, hmun tampi ah bomb an puah ve tiah theih a si. Ref: Khit Thit Media

Be the first to comment

Leave a Reply

Your email address will not be published.


*