Breaking News: Loikaw Khualipi Cu Uico Ralhrang Nih Vanlawng 2 In Bomb An Thlak

SAC ralhrang phu nih jet fighter hna hmang in nihin January 11 ni, zanlei suimilam 5:45 pm ah bomb an thlak hna tiah Karenni ralkap phu fonh hna sin in theih a si. “Tu zanlei suimilam 5:45 pm ah, Jet fighter 2 in bomb an thlak. Khoika hmun zawn ah a tla i, minung pazeizat an hliam timi theih a si rih lo. Tanglei zong in Karenni ralkap hna he kahdohnak a fah ngai” tiah,

Karenni National Defense Force phu chungtel pakhat nih Yangon Khit Thit Media ah a chim. Tu kar hrawng hi Loikaw le Demawso khua kar khuate hna le Loikaw khua kiang sang cheukhat ah SAC ralhrang phu le Karenni ralkap phu fonh hna kar kahdohnak fah a chuak i Loikaw khuami tampi zong nih khuapi an chuak tak hna tiah theih a si.

Thawngpang dang: Karen ramkulh, Kawkareik myone chung ah SAC ralhrang phu hna nih January 10 ni ah raltuknak helicopter in an kah hnu ah SAC ralhrang phu Myo Hong khua chung ah an lut i, khuami inn an baoh, an duhmi thilri hna an lak hna pinah, khuami satil hna zong an duh duh in an thah i an ei hna tiah KNLA lei nih thawngthanhnak an tuah.

January 10 ni ah SAC ralhrang phu nih helicopter in a kah hnu ah Myo Hong khua chung ah uico ralhrang hna an lut i an thai dih. Khuami thilri a tha deuhmi paoh an lak dih. Khuami satil  vok hna zong zan ah an thah i an ei hna. Khuami thilri cheukhat zong an duh paoh in an hrawk hna. Kanmah kan Tatzinhmu kan pu Myint Kyi pumpak zong nih a va zoh khawh” tiah,

KNLA lei in tuanvo ngeitu pakhat nih a chim. Khuami an umnak khua chung ah a kahmi SAC ralhrang phu helicopter pakhat zong kan hnu ah KNLA nih an kah hna. Nizan zong ah PDF pawl nih rocket in vanlawng an kah ve. Tu kum kum hramthok cu raldohnak lawng te a si i, ralhrang a thimi zong an hong karh ngai cang. December 7 in January 7 tiang ah ralhrang 2000 leng an thi. Ref: KTM