Mindat Ah Rallokap Le Mipi An I Kap zanlei suimilam 3 hrawng in a thawk
Mindat khua Kohkun pawngah tu zanlei suimilam 3 in rallokap le mipi karah kahdohnak a chuam tiah thawng theih a si.
“Zanlei suimilam 3 hrawng in Kohkun pawngah kaphnih kar i kap nak a chuak a tu zong meithal thawng khuachung lei a neih cuahmah” tiah Mindat khuami pakhat nih a chim.
April 24 ah Mindat ah tlaihmi nu pali, pa pathum dihlak pasarih an tlaih mi hna cu thlah piak dingin an hal hna nain rallokap lei nih an thlah hna lo caah April 24 zongah i kahnak a chuak cang tiah theih a si. Credit : The Chin Post
Relchap : May thla chungah ralkap doh kan lim a herh (By: Rolian)
Ralkap nawlngeihnak hrawh le Federal uknak sernak ding ah hrianam in ralkap hrawh lawng hi lam tha bik le a caan zong a tawi bik mi lam a si. Ramkheel lei in kan tawlrel ahcun NCA tluk in lamcaan a sau lai, Phunghram pi a nung than kho, Ralkap nawlngeihnak a dong thlu kho lai lo caah ramkheel lei biaruahnak cun nihin kan ram buainak hi kan tawlrel lo ding a biapi taktak.
Atu hi May thla chung kan lut cang lai. a rauh hlan ah furpi khuacaan he kan i tong than lai i furpi khuacaan ahcun thli le ruah tampi ruang ah ramchung mipi lei cawlcanghnak hrampi a cat kho mi a si caah ralrin ngai a herh.
Thal caan lam a that lio hmanh ah laitlang ah duh ning in fang tlun kal pi le zuar cawk khawh a si ti lo. Ralkap nih fang cawk le phurh hrimhrim an duh ti lo. cu lio caan ah furpi ruah sur caan le bang ahcun eidin zalh nak lei zong ah harnak ngan kan tong peng bantuk in atu lio kan ram buainak ruang ah duh ning in ralkap hi kan doh kho te lai lo.
Cucaah fur tlak hlan may thla chung ah ralkap doh ding hi CRPH le NUG niha tawlrel a herh. Fur pi tlak hlan ah ralkap kan doh lo ahcun furpi ahcun doh lo ah a tha bik lai. zei ca tiah ahcun furpi khuacaan ah ralkap kan doh ahcun mipi humhimnak le dornak hmun lei caah harnak ngan a um hrimhrim lai. Thal caan ahcun ramlak ah I dor khawh a si. asinain furpi ruah le thlichia lak ahcun ram lak ah kan I dor ngam ti lai lo caah mipi nih harnak ngan ton sual a fawi.
Furpi ahcun har tong mi hna i zohkhenhnak le thlop bul nak le i bawmh chanhnak lei ah lam a har lai. Bawmh chanh a hau mi hartong an um lai bantuk in mi bawmtu phu hna zong nih fur pi khua caan ahcun mipi an bawm kho ve hna lai lo caah furpi ahcun ralkap doh lo ah a tha bik lai. cucaah fur tlak hlan hrimhrim ah ralkap doh ding in timh lamh a herh.
Fur tlak hnu ralkap doh ding zong tihnung a si fawn. Min Aung Hlaing nih thuk pi ah hram a rak sih manh lai. thimnak a tuah lai i ramchung rakheel lei buainak a sang lai. Mipi kan thi a dai cang lai i a thar in van thawh than le ralkap van doh than ding hi a fawi ti lai lo.
Kawl raawn ahcun fur le thal, khuasik nih mipi a dawn tuk hna lo i harnak zong a mah ning a si ko lai. asinain tlangcung khuasa mi caahcun furpi hi tih nung mi khaucaan a si caah kawl rawn lei thlihran hoih in caan lak lo in tlangcung khuasa mi hna khuacaan zoh in ralkap doh nak caan ser siam hi a herh. Hihi CRPH le NUG nih an fian i a rannak le a tha bik in khua an khan a herh.
Leave a Reply