BREAKING NEWS: Mindat Myo Kahdohnak Ah SAC Ralhrang Pawl An Sunghmi Thli Thup Cazin A Zut: Ni kum kahdohnak fah bik a rak i thok lio, Chin ramkulh, Mindat khuapi, golf certual kahdohnak ah SAC ralhrang phu lei in an thimi, hliamhma tuar, an hriamnam le an thilri a tlaumi cazin an tialnak catap cu social media ah a zut (leak) tiah theih a si.
Cu kahdohnak ah CDF Mindat lei in Lai meithal hmang in an rak doh hmasa kha a si. Cu ti Lai meidal in an rak dohnak ah SAC ralhrang phu lei in a thli tein cazin an tuahmi ah ralram ah an hruaitubik ralbawi 1 le senthum 2 telh in SAC ralhrang phu lei 9 an rak thi tiah an cazin zutmi ning in theih a si. Hliamhma a tuarmi min cazin ah Captain (Boci) 4 telh in ralhrang minung 32 nih,
Hliamhma an tuar tiah theih a si. Hriamnam an sunghmi zat hi a phun in phun 12, kuan le zenthong an sunghmi hi a phun phun 16, cun a dang rihkhiah in hman ding an timi thilri pawl a phun phun 39 a tlau tiah an thlithup cazin a zutmi ah an langhter dih hi a si. SAC ralrhang phu motor a tlaumi zat hi an cazin ah an langhter chih lo ti si. An cazin zutmi tar chih a si.
Mindat khuapi chung golf certual kahdohnak ah pumpak hrimhrim in aa telmi CDF Mindat ralkap hna nih an chim ning cu, atu a zutmi thlithup cazin hi tlamtlin loin an tuahmi cazin a si kho ti a si. “Kanmah nih ralhrang motor 6 bak te mei kan khangh i kan hrawk. A dang motor 2 cu thilri phurnak ah kan hmang i an dihlak 8 a si” tiah CDF Mindat ralkap pakhat nih a chim.
CDF Mindat nih golf certual kahdohnak ah an lak khawhmi motor 6 cu mei an khangh i a dang 2 cu thilri phurhnak ah chitkhat an hmang ti si. “A thimi cazin le hliamtuar cazin an tuahmi cu a dik kho men. Captain rank ngei tampi an i telmi hi kanmah zong atu lawng ah kan theih” tiah CDF Mindat ralkap lei nih an chim.
Cu lio ah ralram ah an hruaitubik Captain pakhat a thi i SAC ralhrang pawl cu vaivuan in an zam hna ti si. “Ka theih khawh tawk ka chim ahcun cazin chung an tialmi zat le kanmah nih kan mit in kan hmuhmi zat hriamnam le thilri dangdang pawl cazin aa thlau tuk. Cazin chung cu a tlawm ngai te” tiah CDF Mindat ralkap chungtel pakhat nih a chim. Source: The Mindat Post
Leave a Reply