Kalaymyo in ralhrang motor 30 in 40 kar cu nihin October 11 zinglei suimilam 7:30 hrawngah Lai tlang lei ah a kai tiah khuami hna nih an chim.
Cu ralhrang motor chung ah cun facang tun bantuk le thilthuam sawh in palik le ralhrang zong an i tel.
October 9 ni zongah Lai tlang lei ah ralhrang motor 15 leng le Tank motor pahnih a kai tiah Zalen nih a tial. The Chin Post
Relchap : Ralhrangbu Nih Defense Ministry Caah Kyat Billion 1700 Leng Hman A Timh (News dang pahnih he)
Ralhrangbu Nih Defense Ministry Caah Kyat Billion 1700 Leng Hman A Timh: Ralhrangbu nih October, 2021-March 2022 tiang, thlaruk chung cozah tangka hman ding (Budget) an sermi cu Oct 10, tuni ah an thanh. Ralhrang nih nawlngeihnak an lak hnuin a voikhatnak an sermi Budget ah runvennak vuanci (Defence Ministry) caah Kyat Billion 1700 leng kan hman lai tiah an thanh.
Hihi vuanci zung vialte lakah budget a tam bik changtu a si. Budget tam bikmi cu cozah riantuantu vialte thlahlawh a petu Ministry of Projects & Financial a si.
Ralhrangbu chimnak nawlngeitu Bochoh Zaw Min Tun nih cun “Hihi kum hmasa budget nakin a tlawm deuh” tiah a chim. A chim duhmi cu NLD chan i Denfence caah an hmanmi budget nakin tlawm deuh kan hman tinak a si.
Asinain Bochoh Zaw Min Tun nih lih a chim ti a fiang. Ralhrang nih nawlngeihnak an hlak hlan NLD cozah chan i Defense caah an halmi budget cu Kyat billion 1300 renglo lawng a si. Ramchung buainak le kahdohnak a um lio a si caah ralhrangbu nih defense caah tangka tam deuh an halmi cu khuaruahhar ding a si lo tiah ramkhel thiamsang hna nih an chim.
Ralhrangbu nih kumkhat ca budget an halmi Kyat billion 1700 renglo chungin thlaruk (kumcheu) caah billion 9000 hman an timh. Kumcheu ca budget ah fimcawnnak caah Kyat billion 1000 leng lawng hman an timh. Ngandamnak ca hman dingmi a tlwm deuh rih.
Ngandamnak ca hman an timhmi cu Kyat billion 500 lawng a si. Covid dohnak ca hman an timhmi Kyat billion 100 he fonh hmanh ah billion 600 lawng a si. Ref: BBC
Monywa-Mandalay Lampi Ah PDF Bu 10 Nih Ralhrang Mawtaw An Kah, Ralhrang Tam Tuk An Thi: Oct 10, tuni zanlei suimilam 5 hrawngah Monywa-Mandalay lampi Kwaypindaw (ဂွေးပင်တော) khua pawngah ralhrang mawtaw 7 cu PDF bu 10 hna nih an kah i ralhrang tamtuk an thi tiah theih a si. PDF bu 10 hna cu Chaung U PDF, Monywa People Defence Force – MPDF, Myaung peng mipi vengtu le humhimtubu (မြောင်မြိုနယ် ပြည်သူ့ကာကွယ်ရေးနှင့် လုံခြုံရေးအဖွဲ့-CDSOM), Myaung Special People’s Defense Force – MSPDF, နှလုံးလှလူမိုက်ကြီးများအဖွဲ့, 27 Revolution Forces PDF – Taloke, Minmu Pikpak bu, ၊People Defense Force Yesagyo le Sagiang ramthen mipi vengtubu (SGG) hna an si.
Ralhrang lei hi a thimi an tam ti cu theih a si nain zeizat dah an thih ti bel an i fiang kho lo. PDF lei cu hliamtuar le a thiami an um lo tiah theih a si. Local PDF hna he hmunkhat ah dir in khongton uknak a hram in kan hrawh dih hlan tiang kan doh lai tiah Chaung U PDF nih an thanh. Ref: Khet Thit Media
Ralbawi Myo Htut Hlaing PA Le A Mawtaw Khaltu An Zam Timi Cu A Diklo Tiah Ralhrangbu Nih An Thanh: North-West Command Headquarter i Deputy Commander Bohmuchoh Myo Htut Hlaing i a personnel assistance an zam i CDF sinah an i fonh theih a si. Asinine hi kongah ralhrangbu nih cun “Hihi a dik lomi a si, an pahnih in tha tein an rian an tuan ko. Pehtlaihnak lei a tuanmi pakhat bel Oct 1 khan chim ta loin a kal” tiah an thanh.
CDF hruaitu pakhat nih cun “Ralhrangbu tangah kan um huam ti lo, cu pinah khongton uknak hrimhrim kan duh lo. Ralhrangbu tangah hin miphun thleidannak a um. Biaknak kong telh in anmah le anmah, duhtainghmu le biohahmu (ဒုတိုင်းမှူးနဲ့ ဗျူဟာမှူး) karlak ah lungrkhah lonak a tam. Anmah an lung an i khah lo tikah an tangle hna cu kan i nuam ti lo. Curuangah CDM an tuahnak a si” tiah a chim.
Ralbawi Myo Htut Hlaing PA le a mawtaw khaltu cu CDF nih tha tein kan zohkhenh hna tiah tuanvongeitu pakhat nih a chim. Ref: The Irrawaddy News
By. Salai CP Lian
Leave a Reply