Dec 28, tuzing ah Kalay peng Natchaung khua cu ralhrang nih an luhhnawh i an khangh ṭhan tiah theih a si. Tuzing i an khanghmi he cun Natchaung khua ah ralhrang nih inn 20 leng an khangh cang.
Khuami pakhat nih cun “Ralhrang hna cu Natchaung khua nichuah lei in an rak lut i tuzing suimilam 9 hrawngah inn an khangh ṭhan. Tuni in a voili nak an khangh a si cang. An khanghmi dihlak inn 20 leng a si cang” tiah a chim.
Cu lawng si loin ralhrang nih Natchaung khuami an thahmi hna hi 20 an si cang i hmundang le khuadang ah a zam mi thongkhat renglo an si. Khuachung ah cun tar le kum upa deuh lawng an taang cang.
Bawmhchanhnak rianṭuantu pakhat nih “Thahnawn a tongmi khuami an tam ngai cang. An ruak kan lak khawhmi hna hi 11 an si, kan lak khawh rih lomi zong an um rih. Khua an khangh khan tar le ngakchia hna cu a si khawh chungin chanhchuah kan i zuam. Mizaw damlo cheukaht le a umkal kho bak lomi hna cu an taang ko, zeizat an si tu kan thei lo” tiah a chim.
Gangaw Peng Ah Ralhrang Bomb In Doh An Tong, Ralhrang 4 An Thi: Magway ramṭhen, Gangaw peng chaklei ah a ra mi ralhrang hna cu nizaan December 27 zaanlei suimilam 3:00 hrawngah YDF nih bomd in an doh hna i bomb lei a thiammi palek pakhat telh in ralhrang 3 an thi, hliamhma pu mi an tam tiah YDF nih an thanh.
Ralhrang Nih Karenni Ah Mizapi An Nun Buin An Khanghmi Hna Kongah U Kyaw Moe Thun Nih UN Security Council Ah Ca A Ṭial: Karenni State, Phayusu ah Karenni mizapi 35 nak tlawmlo cu ralhrang nih an nun buin mei a khangh mi hna pehtlai in UN Security Council nih dantat dingin U Kyaw Moe Thun nih ca a ṭial. Myanmar mipi cungah ralhrang nih minung lungthin ngei loin thahnawnnak an tuahmi he pehtlai in UN nih mithmai zoh lo tein a rannak bik in tawlrel a herh cang, UN security Council telh in ramkip rianngeitu hna zong nih Myanmar mipi nunnak kong ah a rannak in hmalak dingah U Kyaw Moe Thun nih a cakuat ah a ṭial.
December 24 ah Karenni, Phayusu ah hngakchia le mino telh in khuami 35 cu an nun buin mei in an khangh hna lawng si loin Save The Children rianṭuantu pahnih zong atu tiang an hmu rih hna lo. Ref: Khet Thit Media
The Chin Post
Leave a Reply