Breaking News: Ralhrang Nih Vanlawng In Ralzam Camp Bomb An Thlak Hnawh

Phruso ah ralzam pawl umnak camp cu tu zing suimilam 1 ah ralhrang phu nih vanlawng in bomb an thlak hnawh i kum 7 ngakchia nute telh in ralzam 3 a hmun ah an thi colh tiah theih a si. Karenni ramkulh, Phruso ralzam sakhan cu tu zing suimilam 1 ah SAC ralhrang phu  nih vanlawng in bomb an thlak i kum 7 ngakchia nute telh in ralzam 3 a hmun ah,

An thi colh tiah People Defense Force – Phruso nih thawngthanhnak an tuah hi a si. Nihin January 17 ni, zinglei suimilam 1:10 am hrawng ah Phruso nitlak lei ralzam sakhan pakhat cu SAC ralhrang phu nih vanlawng in bomb an thlak caah ralzam 3 a hmun ah an thi colh tiah an tarlangh hi asi. A thimi ralzam hna cu Moso khua in ralzammi an si i,

Kum 50 hrawng mipa pakhat, kum 18 hrawng nu pakhat le kum 7 hrawng nu pakhat hna an si tiah theih a si. Nizan January 16, zinglei suimilam 9 in zanlei suimilam 5:45 pm hrawng tiang, Karenni ramkulh, Loikaw myo, Mainglung sang i Seh-hmu Le-ya zung le dot 11 hotel pawng ah SAC ralhrang phu le Karenni ralkap phu fonh kar kahdohnak a chuak i,

SAC ralhrang phu lei in 20 nak tlawmlo an thi tiah Karenni National Defense Force phu nih thawngthanhnak an tuah. SAC ralhrang phu lei in inn dot sang deuh pawl le Technical University cu i khamnak ah an hmang i an rak doh caah KNDF le PDF phu fonh nih i runvennak ah an doh ve mi a si tiah theih a si. SAC ralhrang lei a thimi an tam tuk caah,

Jet vanlawng hmang in zanlei suimilam 5:25 hrawng ah Mainglung sang cu an kah i suimilam 5:30 pm hrawng ah, Loikaw khuapi nitlak lei Nanmekhun khua ah vanlawng in an kah rih caah mi bawmhchanh riantuantu 3 an thi tiah theih a si. SAC ralhrang phu nih sualnak ngeilo mipi hmuitinh in vanlawng kahdohnak an tuah i ral phung an buar tiah KNDF phu nih an langhter chih.

Cu bantuk thiamthiam in cun suimilam 2 hrawng zong ah, Phruso myone, Makharaw sheik khua, Chekoh sakhan in ti than ah a rami SAC ralhrang phu cu KNDF phu nih an kah i SAC ralhrang phu lei in a thimi zong an um rih tiah theih a si. Cu ti a thimi an tam caah ralzam sakhan hmuitinh in vanlawng an kahnak a si khomi a si. Ref: Khit Thit Media