Mandalay ramthen, Pyigyi Takhon myone, (G) sang, 130 lam le Ayethukhah lam kar ah a ummi Eco Max tire rialnak sehzung cu nihin January 3 ni zinglei tuante ah mei a kangh tiah theih a si. Min langhter a duhlomi khuami pakhat nih “Sehzung chung ah zinglei suimilam 4:30 am hrawng ah mei a kangh. Zeiruangah meikanghnak a chuak timi ka chim thiam lo. A rau rih lo” tiah a chim.
Mei kanghnak hmun ah Pyigyi Takhon myone Fire force phu telh in local fire force phu hna le meihmitnak motor hna nih an zuan hnawh hna i mei an hmit khawh cang tiah theih a si. “Zinglei suimilam 5:07 am ah mei kan thing kho i, 5:10 am ah kan hmit kho” tiah Pyigyi Takhon myone Fire Force zung in tuanvo ngeitu pakhat nih a chim.
Meikanghnak kong he pehtlaih in mei aa thok nak ruang le zeizat man a kangh timi theih fian a si rih lo tiah DVB nih a tarlangh hi a si. SAC ralhrang nih uknak an lak hnu thla khat hnih hrawng ahkhan cun Myanmar ram chung hmun tampi ah sehzung a kanghmi a rak tam ngai nain tu hnu ah sehzung a kangh timi thawngpang hi a har ngai cang. Nihin hi a voikhatnak kan theih than a si. Ref: DVB
Thawngpang dang: Sagaing ramthen, Kawlin khuami sipuazi rianngei chungkhat cu SAC ralhrang phu nih January 2 ni, chun suimlam 2 hrawng ah anmah le ann inn cio ah an tlaih hna tiah khuami hna sin in theih a si. Sipuazi rian ngei minung 15 hrawng an tlaih hna tiah amah nunhimnak caah min langhter a duh lomi Sipuazi rian ngei pakhat nih a chim hi a si.
“Atu tlaih a tongmi hna hi facang rialnak seh ngeitu hna, lakphak dawr ngeitu hna le a dangdang sipuazi rian ngeitu hna an si. Zeiruangah an tlaih hna timi cu sualnak ngei lo an sual kawl in phaisa liamter an duh caah a si kho men. Sang chung ahcun anmah le hmuh ning cio in an chim hna. Electric meter man pek lo ruang le,
Hriamtlai phu he pehtlaihnak an ngei ruangah tlaih an tong tiah anmah le ruah ning cio in an chim cio hna. A ngaingai ti ahcun hi hna (SAC ralhrang) nih phaisa an duh caah a si ko” tiah a chim hi a si. Palek sakhan he aa naihniammi hna nih cun tu bantuk in tlaih an tonnak kong fiang tein kan thei rih lo i a tu hi biahalnak an tuah cuahmah lio tiah an chim.
SAC ralhrang phu hna nih Sagaing ramthen chung ah mipi cozah chan lio hrim in ramkhel kong a cawlhcanghtu hna cu tu bantuk in an ruahnak in an rak tlaih hna i biahalnak an tuah hna hnu ah an sualnak an hmuh hna lo ahcun an chungle phaisa in rak tlanh uh an ti tawn hna tiah khuami pakhat nih a chim. SAC ralhrang phu hna nih Sagaing ramthen uk khawh ding in a phunphun in mipi an thihphaih i,
Khuami inn hna an khangh, khua chungah hriamnam ngan hna an kah hna. Kan hnu December 31 ni, zanlei sang zong ah Kawlin myo chung ah hriamnam ngan an kah ruangah phungki siangin cung kuanpi a tlami a puak i kum 16, Koyin (phungki a lut kami te) pakhat a nunnak a liam pinah khuami cheukhat hliamhma an tuar i inn cheukhat zong a rawk tiah theih a si. Ref: DVB
Leave a Reply