BREAKING: Ralhrang Hramhram Uknak A Duh Lo Tuk Ruangah Amah Le Amah Meikhangh In Duhlonak A Langhter Ve Cang

February 1, 2022:  Ralhrang Hramhram Uknak A Duh Lo Tuk Ruangah Amah Le Amah Meikhangh In Duhlonak A Langhter Ve Cang: Kyaukpataung ah “Hramhram uknak chan 2002 – 2005 kum ah ka kir than ti lai lo” tiah a ti i, Ko Aung Aung cu amah le amah mei aa khangh i duhlonak a langhter. Mei a kanghnak ruangah a hliamhma a zual ngai i thinphang dirhmun a si tiah theih a si.

Thil sining cu, Kyaukpataung khuapi ah ralhrang hramhram uknak chan 2002-2005 kum ah ka kir than ti lai lo a ti i khuami Ko Aung Aung nih amah le amah mei khangh in duhlonak a langhter i, atu Ko Aung Aung cu siizung ah an thlawp lio a si. Nain a thi te men lai tiah Kyaukpataung khuami pakhat nih Yangon Khit Thit Media ah a chim hi a si.

“Kyaukpataung, EPC zung pawng ah amah le amah mei aa khangh. Catlap cungah ralhrang hramhram uknak chan ah ka kir than lai lo tiah a tial. Atu hi (Ko Aung Aung cu) siizung ah a um lio a si. A zualhma ngai i, emergency room ah chiah a si. A nung than lai zumh a um lo” tiah Kyaukpataung khuami pakhat nih Yangon Khit Thit Media nih a chim hi a si.

Amah le amah mei aa khanghmi pa dirhmun cu a nunnak caah thinphang dirhmun a si ti zong in theih a si. Kyaukpataung area media a simi K-Media nih a tarlangh ning ah, amah le amah mei aa khanghmi pa cu Kyaukpataung khuapi chung, Pyidawthar, Shwetansar lam ah khuasami Blacksmith riantuantu Ko Aung Aung a si tiah theih a si. Ref: Khit Thit Media

Thawngpangdang: Kut Bengh Ruangah Minung 10 Nak Tlawmlo Ralhrang Nih An Tlaih: Yangon khua lai cer, 32 lam ah, tuzan lei suimilam 4 pm kut bengh in duhlonak langhter ruangah minung 10 leng cu SAC ralhrang phu le Palek ralhrang phu nih an tlaih tiah khuami hna sin in theih a si.

Zanlei suimilam 4 ah kut bengh cio a si i, inn cit motor he inn kar lam chung an lut i an tlaih hna. Minung 10 leng an tlaih. Atu tiang an kir rih lo. Ralhrang motor 2, palek motor 1 he an si” tiah khuami pakhat nih Yangon Khit Thit Media ah a chim hi a si.

SAC ralhrang phu nih nihin Silent Strike tuahmi tlamtlin kho lo ding in a lam phunphun an i zuam ko nain Kawlram mipi hna nih lung tho ngai in Silent Strike an tuah caah rampumpi a king dih i, ralhrang hramhram uknak duhlonak cu nihin ah langhter a si tiah mipi hna nih an chim. Ref: Khit Thit Media