Sagaing ramthen, Myinmu myone, Padat Htaing khua cu SAC ralhrang phu nih nihin January 31 ni, zinglei suimilam 11 am hrawng ah MI 35 Helicopter in voi 6 an kah hnu ah, Helicopter 2 in cu khua pawng ah ralhrang an thlak hna i khua chung ah an lut tiah Myinmu myone News and Information lei in tuanvo ngeitu pakhat nih Yangon Kyit Thit Media ah a chim.
“Nihin zinglei suimilam 11 hrawng ah Myinmu myone nitlak-chak lei Padat Htaing khua cu SAC ralhrang helicopter 2, MI 35 pakhat he voi 6 an kah. Seh methal zong in vanlawng cung in an kah hna. Helicopter pakhat cu SAC ralhrang pawl voi hnih a thial hna i a tlak hna. Atu hi Padat Htaing khua an hrawng lio cuahmah a si i, inn pakhat cu an khenh ti si.”
“Thil sining dikthlir kan hlat cuahmah lio” tiah Myinmu myone News and Information lei in tuanvo ngeitu pakhat nih a chim hi a si. Cu helicopter hna cu Sagaing ramthen ah hrambunhmi, Northwestern Command umnak in a rak zuangmi a si i, atu hi Alappa-ChaungU lam, Monywa – Mandalay lam pawl hman rih lo ding in Local PDF phu nih thawngthanhnak an tuah tiah theih a si. KTM.
Thawngpang dang: Sagaing ramthen, Depeyin myone, Ngawetaw khua ah nihin January 31, zinglei suimilam 9:15 am hrawng ah a lutmi SAC ralhrang phu nih khuami inn mei an khangh i an hrawk piak hna caah khuami inn 2 a ciam dih tiah theih a si.
Hmantha khua lei in ralhrang phu 2 an i then i khua chung an lut. Meithal zong an kuan a card ning pi in an suai/kah dih. Ngawetaw phungki sianginn ah an lutmi kan hmuh hna. Phu dang hna nih khuami inn an khangh. A tlawmbik khuami 2 a kang i khuami dihlak an zam dih tikah an tlaihmi cu a um lo” tiah ralzam ve mi pakhat nih a chim hi a si.
SAC ralhrang phu hna nih tuzing suimilam 8 am hrawng in Waba khua ah an meithal an kah hnu ah khua chung an lut i cu ti cun Hmandaw khua an tan i Ngawetaw khua ah an va lut hi a si tiah theih a si. Ref: KTM
Thawngpang dang: Shan ramkulh, Ywangan khua i SAC ralhrang phu ngeihmi Mytel Tower tung a kang. Thlanglei Shan ramkulh, Danu mahte in i uknak area (Danu Autonomous Region) Ywanga myone, Pinnwekung khua le Nyaung in khua kar lak ah SAC ralhrang ngeihmi Mytel Tower tung cu nihin zinglei suimilam 3 hrawng ah Local PDF phu nih mei an khangh i an hrawk piak hna tiah theih a si. Ref: KTM
Leave a Reply