CDF Matupi Nih Kahdohnak Thawng Cathanh An Chuah Ve Cang

CDF Matupi Nih Kahdohnak Thawng Cathanh An Chuah Cang: Tu lio hi Chin ramkulh, Matupi peng ah SAC ralhrang phu le CDF phu fonh kar kahdohnak a chuak lio pi a si. SAC ralhrang phu nih khuami minung 9 an tlaihmi hna zong an thi thawng theih a si i, nihin tiang ah ruak 7 an hmuh cang ti zong in theih a si. Tu lio Matupi peng chung kahdohnak thawngpang fian tein a theihtu CDF Matupi nih,

Tu nai te kha thawngthanhnak an tuah i a tanglei bantuk hin a si. An cathanh chuahmi cu Kawlca in a si, aa tlak ning in leh chin a si. Cathanh: 2022, January 6 ni thok in Matupi – Hakha lam cung, cakeih lei in a ummi Kihlung khua le Lunghlaw khua kar ah SAC ralhrang phu le CDF Matupi ralkap kar kahdohnak fah a rak chuak.

Kahdohnak a chuahnak hmunhma he aa naihniambik khua hna ah SAC ralhrang phu nih thazaang tampi hmang in 2022, January 6 ni, chun ah Kihlung khua in Lunghlaw khua lei ah khual a tlawngmi khuami 8 si hna sih, zanlei sang ah Kase khua in Kihlung khua le Datsi cawk ding in a kalmi khuami 1 le January 7 ni ah,

Buithia khua in Kase khua lei khual a tlawngmi khuami 2 hna cu SAC ralhrang nih an tlaih hna. Cu an tlaihmi hna cu ralram ah lam hruaitu ah le anmah ikhamnak (human shield) ah an hmang hna hnu ah, cu an tlaihmi khuami 10 hna cu zoh chia ngai in an thah hna i an ruak pawl cu zoh chia ngai in an hlawnh hna.

Cucaah kanmah CDF Matupi nih ralram i thah a tongmi sualnak ngeilo mipi hna kong ah kan ngaihchiatnak le SAC ralhrang hloh dih hlan tiang kan doh lai tiah biakamnak kan tuah” tiah acathanh an chuahmi an langhter hi a si. Tu lio cu Matupi peng lei ah SAC ralhrang motor tampi le tank le helicopter tiang in an kai hnawh cang tiah theih a si. Cucaah kahdohnak fah a chuah rih kho i thlacam bawmh cio hna usih.

Thawngpang a lengmi cu Matupi peng ah rang sii chunh in rak tlakmi SAC ralhrang phu minung 100 hrawng cu chun ah an i thup i, zan lawng an kal caah lam an tlau i, an tlaunak ah CDF phu nih an phit kanh hna i, CDF Lautu nih an kahnak ah 30 hrawng an thi cang timi thawngpang a len ve. Cu Local CDF lei nih phung ning tein thawngthanhnak an tuahmi a um rih lo caah fehter khawh a si rih lo.