CDF Mindat Le Ralhrang Kar Kahdohnak Ah Ralhrang 6 An Thi I Hramnam Zong An Lak Khawh

Matupi in Mindat lei a rami SAC ralhrang motor run cu CDF – Mindat nih Mindat – Matupi lam ah pehzulh in a kah hna i, nihin January 3 ni, chun hnu suimilam 2 hrawnghrang zong ah Mengtung 28 nak pawng hrawng ah kap hnih kar kahdohnak a chuak than tiah CDF – Mindat in chimhnak nawlngeitu Salai Yaw Mang nih a facebook ah a tarlangh hi a si.

Nihin kahdohnak ah SAC ralhrangn phu le a thimi an um lai tiah ruahdamh a si nain a thimi zat theih khawh a si rih lo. Cu kahdohnak ah CDF – Mindat pasaltha 2 nih hliamhma (thinphang ding um lo) an tuar tiah Salai Yaw Mang nih a langhter chih. SAC ralhrang phu motor run cu atu hi mengtung 23 nak ah an phan lio a si i, cu ka hmunhma ah zan an riah men lai tiah ruahdamh a si.

Nizan February 2 ni ah, Mengtung 32 le 30 kar ah kahdohnak a chuak i, cu kahdohnak ah SAC ralhrang phu lei in 6 an thi pinah hliamhma a tuarmi zong an um ti si. Cu kahdohnak ah CDF – Mindat lei nih ralhrang phu sin in MA 3 meithal zunkhat an lak khawh tiah Salai Yaw Mang nih a tarlangh hi a si. Atanglei hi nizan kahdohnak thawngpang le Mindat le Matupi kar kahdohnak pehzulh in a umnak kong thawngpang a si. Credit: Yaw Mang

Matupi in Mindat lei a kalmi SAC ralhrang motor 80 leng aa telmi motor run le CDF Mindat ralkap hna cu Mindat – Matupi lam ah pehzulh in kahdohnak a chuah rih ko tiah theih a si. The Mindat Post nih a tarlangh. Cu SAC ralhrang phu motor run cu Matupi in Mindat lei ah an kir than lei ah a kalmi an si i, an kirnak hi ni 10 leng an si cang tiah theih a si.

CDF Mindat lei nih lam tamtim ah an kah lengmang hna tiah CDF Mindat ralkap phu hna sin in theih a si. Kan hnu kum fur caan zong ah Matupi in Mindat lei a kalmi SAC ralhrang motor run 90 leng cu CDF Mindat nih lam tamtim ah an rak kah hna. Cu ti an kah ruangah SAC ralhrang phu lei in tampi an thi i ni caan saupi an rau hnu ah Mindat lei an rak phan tiah theih a si.

Atu rua ti a um lo caan zong ah SAC ralhrang phu pawl cu Mindat le Matupi kar ah ni 10 leng an rau cang nain an kal duhnak hmunhma tiang phan kho loin duhsak tein an i thawn tiah theih a si. Cu Mindat le Matupi kar motor lam cu SAC ralhrang bawi Tatzinhmu (Leieutenant Colonel) pawl an thihnak lam a si i,

SAC ralhrang phu tam tak an thinak, kir thannak lam a um ti lonak hmunhma asi tiah khuami hna nih an chim. CDF Mindat hi Kawlram chung hmanh ah hriamnam in SAC ralhrang a doh hmasatu miraltha bak an si hna. Ralhrang motor an khanghmi zong a tam cang i, an thahmi ralhrang kut chung in hriamnam aa chap thluahmahmi Chin pasaltha hna an si. Ref: The Mindat Post