CDF Mindat Nih Ralhrang Kut In MA3 Meithal An Lak Nak Kong Fianternak A Tuah

February 5, 2022: Chin ramkulh Mindat ah a thi cangmi ralhrang kut cung in MA3 meithal nun thap in an lak khawh. CDF Mindat nih SAC ralhrang motor chung ngakchia aa tel caah kah loin hnu an tolh tak hna. Chin ramkulh, Mindat ah February 2 ni kahdohnak ah SAC ralhrang 3 an thi i, cu a thimi ralkap sinin MA 3 meithal pawl cu nunthap in an lak kho tiah,

CDF – Mindat in chimhnak nawlngeitu Salai Yaw Mang nih a facebook ah a tarlangh. “February 1 ni, zanlei suimilam 4 le cheu hrawng ah Mengtung 30nak zawn kahdohnak ah SAC ralhrang 3 hrawng an si i, a thi cangmi SAC ralhrang pawl sin in CDF – Mindat nih MA3 meithal zunkhat an lak khawh. Lam aa mernak zongah SAC ralhrang phu nih,

Hmailei ah security an rak thlak chunmi pa nih a hnulei in a ra dingmi pawl khamnak ah a kah piak hna lio ah, lam kam tilu luannak ah aa thupmi CDF – Mindat 2 nih hmai rak thlak mi ralhrang cu an kah that i, a kut cung meithal an chuh hnu lam tang ah an ttum than. Cu kahdohnak cu minute 5 hrawng lawng a rau. SAC ralhrang 3 an thi, MA3 pakhat kan lak khawh.”

“SAC ralhrang phu nih lam kam ah an hawi ruak pakhat an vui i, an thisen a tlami pawl kha an tuah tawn bantuk in vawlei an khuh i an kaltak” tiah Salai Yaw Mang nih a chim hi a si. Cu ni thiamthiam ah SAC ralhrang pawl motor cung ah ngakchia aa telmi an hmuh caah CDF Mindat lei nih kah duh loin hnu an tolh tiah Salai Yaw Mang nih a tial rih fawn.

“Kan pasaltha (Yebaw) pakhat nih SAC ralhrang motor pakhat cu lam cunglei ah hmunhma la in ka phomh lai a ti lio ah motor chung ah ngakchia lawngte an thut kha a hmuh. Cu tikah zeihmanh an tuah kho ti lo. Cu ti cun a meithal a lak i kah a timh cu a puak lo. A meithal aa remh than i, ka kah lai a ti nain zeihmanh a thei lomi ngakchia thah ding cu,

Pathian nih a duh lai lo ti a ruah caah kah loin hnu a tolh tak hna” tiah Salai Yaw Mang nih a facebook ah a tarlangh hi a si. CDF – Mindat nih hin nizan February 4 ni zong ah SAC ralhrang 7 an thah rih hna. Matupi in Mindat lei a rak rami ralhrang pawl cu CDF Mindat nih kal kho lo in an tuah i, ni 10 cung lamtamtim ah an kah lengmang hna hi a si. Ref: KTM