CDF Uknak Area Ah Mah Tein Sianginn An On Cang Nain Herhbau Tuk In An Um

CDF Uknak Area Ah Mah Tein Sianginn An On Cang Nain Herhbau Tuk In An Um: Kanpalet – CDF nih an uknak area chung ah siangngakchia pawl pehzulh in sianginn an kai kho ding in an on piak mi sianginn caah cacawnnak ah a herhmi telh in thil dangdang a herhmi a tam tuk rih tiah Kanpalet peng fimcawnnak lei tuanvo ngeitu Board phu sin in theih a si tiah Chin World nih a tarlangh.

Covid pulrai boruah le ramkhel dirhmun boruak ruangah sianginn khar a si caah siangngakchia pawl pehzulh in sianginn an kai khawhnak caah tiah December 28 ni thok in CDF – Kanpalet pawl nih an uknak pengtlang chung ah sianginn an on than cang nain cachimhtu saya sayamah pawl an izat lo pinah, atu a ummi saya sayamah hna ei le din ca tiang harsatnak a um tiah theih a si.

Kanpalet peng fimcawnnak lei tuanvo ngeitu buu (Kanpalet Township Education Board) chungtel pakhat nih “Kamah nih sianginn kan onnak area hna cu CDF nih an uknak area hna ah kan on hi a si. Cu sianginn hna ah cacawnnak ca a herhmi thilri pawl nan kan bawmhchanh ding le Volunteer in aa pe kho dingmi Saya sayamah kan in sawm ko hna” tiah a chim.

Education Board phu nih khua nupa hna nih an si khawh tawk in bawmhnak pek cio ding le tanghra a awng cangmi, degree a la cangmi hna le university a kai liomi siangngakchia hna cu siang cachimh ah volunteer I pe cio ding in bawmhhalnak ca an chuah ti si. Eduction Board chungtel pakhat nih, “Kei ka hmuh ning cun, a hlu duhmi an um ahcun innka kan on piak peng hna.”

“Fimcawnnak kong ah kanmah Education Board phu kan ser i, kanmah nih kan thokmi a si caah nan kan hlut cio ding in sawm kan duh ko hna” tiah a chim. Chin ramkulh, Kanpalet peng Education board phu nih National Unity Government in fimcawnnak lei vuanci zung he pehtlaihnak tuah in Pengkomh uknak tang ah pengkomh fimcawnnak tuah an i timh hi a si. Ref: Chin World