CDM Vuanthok Van Kung Le Indian Ralkap Motor A Hmutu Ralzam Ngakchia Nute Biaruahnak

CDM Vuanthok Pu Van Kung nih Mizoram state, khua te pakhat ah ralzam in a ummi ngakchia nute nih Indian ralkap pawl motor pakhat a hmuhmi kong biaruahnak an ngeihnak kong a tarlangh. CDM Vuanthok Salai Van Kung nih a tialmi cu Kawlca in a si caah a tanglei bantukin aa tlak ning in catialtu nih a van leh chin hi a si. A tialmi cu;

Mizoram state, khuate pakhat ah Indian ralkap motor pakhat a  hmumi ralzam ngakchia nute pakhat nih hi bantukin biahalnak a ka tuahmi le lehnak tete; Ngakchia nute: ‘Anmah khi inn meikhangh ding maw an ra?’ Lehnak: A silo ka fanu. Hi rammi ralkap hna cu mipi an daw i an zohkhenh hna. Inn mei khangh ding in a rami an si lo.

Ngakchia nute: ‘Inn meikhangh ding a rami an si lo ahcun CDF maw an si?’ Lehnak: ‘An si lo, ka fanu. CDF an si lo. Hi rammi ralkap an si. Anmah cu an lungput a tha tuk. CDF bantukin hi ram ah a ummi hriam a tlaimi an si. Anmah cu mipi pawl a kan runvengtu an si, ka fanu.” Ngakchia nute nih ‘aw’ a ti i, an biaruahnak an donghter.

CDMer Vuanthok Van Kung nih a tanglei bantukin a chim duhnak a langhter chih. A timi cu, ‘Ngakchia nute lei keimah bia kan iruahnak tete kan zoh ahcun Myanmar ram ah a ummi ralkap pawl an sualning cu ngakchia upa dihlak nih kan theih dih timi hmuh khawh a si. Cu pinah kanmah Thantlang mipi dihlak nih kan pekchanhnak le kan tuarnak siseh,

Mipi dihlak nih CDF kan dirhkamhnak le thazaang kan peknak siseh, uico ralhrang dictatorship a hram in chat kan duhnak pawl hmuh khawh a si rih fawn tiah a duhnak fianternak a tuah hi a si. Hi hi CDMer Vuanthok Salai Van Kung nih nihin 2022 kum, nihin January 9 ni ah a facebook timeline ah a tarlanghmi cu a si. Credit: Salai Van Kung

Biakilh: Ralkap timi cu ram runvengtu le mipi kilhimtu an si awk a si. Nain Kawlram chungah cun mipi nih ralkap hmuh hi misual damiah tapung hmuh bantuk a si cang i, a kan thahtu a kan hrawktu kan ral hmuh in hmuh an si cang. Hi bantuk Kawl ralkap bantuk hi cu an hram in phoih dih le hloh dih lawnglawng ah hi hnu kan tefa hna nih ralkap thatnak an hmuh khawh hnga ding khi a si cang.