January 10 ni ah aa thok mi Hiangzing kahdohnak cu January 22 tiang a rau i SAC ralhrang 80 leng an thi i Chin ralkap phu lei in 3 nih ram le miphun caah an nunnak an pek tiah PDF – Zoland nih January 24 ni ah thawngthanhnak an tuah. Hingzing cu Sagaing ramthen, Kalay myo le Chin ramkulh Tedim, Falam, Hakha kalnak lam ah a ummi khua a si pinah India – Myanmar ramri pehtlaihnak lam chung a ummi khua a si rih i Kalay myo in meng 20 leng hrawng a hlatnak ah tlangcung um khuate pakhat a si.
Hiangzing kahdohnak ah SAC ralhrang phu hna cu CDF phu hna telh in PDF – Kalay le CDF – KKG phu hna fonh in an doh hi a si. Kahdohnak ah CNA, Zoland – PDF, CDM – Siyin, CNDF, Zomi – PDF, PDA, Zogam Army, CDF – KKB le PDF – Kalay hna phufonh nih an doh hi a si i, Chin ramkulh chung a chuakmi SAC ralhrang phu le Chin ralkap phu kar kahdohnak cu Local CDF phu tambik fonh kahdohnak zong a si.
Cu kahdohnak cu January 12 ni ah Sagaing ramthen, Kalay myo in SAC ralhrang thazaang 100 leng cu Chin ramkulh lei an rak kai ni thok in a chuakmi kahdohnak a si. January 13 ni, zinglei suimilam 10 am hrawng kahdohnak cu ni 12 ni ah Hiangzing khua pawng i SAC ralhrang pawl hmunhma an rak khuarnak ah a si i SAC ralhrang 7 an thi. Cu ni kahdohnak ah Chin ralkap phu fonh cu him tein hnu an tolh kho.
Cu ni thiamthiam chun suimilam 2 hrawng ah ralhrang phu nih Htay zan khua coffee dum chung inn 3 an khangh tiah Local CDF phu nih thawngthanhnak an tuah. Chin ram le SAC ralhrang pawl an kai cuahmah lio December 25 ni ah ralhrang phu nih an tlaihmi CDM – Siyin ralkap pakhat cu lamhruaitu ah an hmang i, cu Siyin ralkap zong him tein a zam kho. Cu ni kahdohnak cu CDM – Siyin, PDF – Zoland, Zogam Army, PDA, CNDF phu fonh nih an kahmi a si.
January 14 ni, zinglei suimilam 10 in zanlei suimilam 3 tiang kahdohnak fah a chuak i cu kahdohnak ah SAC ralhrang 1 a thi i hliamhma tuar an tampi tiah CDM – Siyin nih thawngthanhnak an tuah. January 15 ni ah SAC ralhrang phu lei a thimi an tam tuk caah Kalay University kulh chung in Chin ramkulh lei ah hriamnam ngan in an hung kah pinah vanlawng 2 in bomb an thlak rih hna caah Mipi ralkap lei in minung 7 nih hliamhma fak an tuar. CNA in Sergeant Thang Pui hi a hliamhma a zual khun.
January 16 ni ah hliamhma fah khun in a tuarmi CNA ralkap Sergeant Thang Pui cu a hliamhma tuar khawh ti loin ram le miphun caah a nunnak a pek. January 17 ni, zinglei suimilam 10 hrawng ah Chin ramkulh le Kalay myo kar motor lam ah motor hme 2 cu Chin ralkap CDF phu fonh nih an kah i ralhrang 10 an thi i hliamhma tuarmi an tam caah Kalay myo lei an kir than.
January 18 ni ah Kalay University le Kalay myo, Taungphila tlang cung ah zinglei suimilam 8 thawk in hriamnam ngan in Chin ramkulh lei an hung kah. SAC ralhrang phu le Chin ralkap CDF phu fonh kar kahdohnak tlawmpal a chuak. SAC ralhrang phu nih hmunhma an khuarnak Hiangzing area in an chuah tuak ve lo.
January 19 ni, zinglei suimilam 10:30 am hrawng ah SAC ralhrang phu nih Tedim peng Kennedy tlang sakhan ah helicopter in an ralkap cheukhat le thilri an hung kuat. Cu ni chun ah kap hnih kar kahdohnak tlawmpal a chuak hnu ah zanlei ah Hiang zing um ralhrang pawl chung in 2 an thi. Falam in Tedim lei a kalmi SAC ralhrang tazaang 180 leng cu CNDF nih fak ngai in an kah caah hmai lanh kho loin Lungbang khua ah an tang.
January 21 ni, zinglei sumilam 10:45 am hrawng ah Chin ralkap CDF phu nih Hiang zing khua ah hmunhma a khuar mi SAC ralhrang phu pawl cu an lut hnawh i an phomh caah SAC ralhrang phu 15 an thi pinah tampi nih hliamhma an tuar. Chin ramkap phu fonh lei in pasaltha 2 hliamhma an tuar ve nain thinphang dirhmun an si lo tiah thawngthanhnak an tuah. SAC ralhrang phu bawmh ding Tedim lei in ralhrang 100 hrawng an rak ra caah CDF phu fonh hna nih an phomh ve hna.
January 22 ni ah Kalay University lei in Tedim peng, Taingen, Hiang zing khua kar hrawng ah SAC ralhrang phu nih hriamnam ngan in an hung khah hna. Zinglei suimilam 8:30 am hrawngah helicopter 2 an phan i seh meithal in an kah hna pinah bomb hna an thlak chih hna. Tedim khuapi lei in bawmh ding in a rak rami SAC ralhrang phu hna zong motor lam ning in ra ngam loin ram lak lam in an rak ra hna.
SAC ralhrang phu nih lamhla kahnak 60MM, 120MM, 155MM hna le helicopter tiang an hman hna. Cu kahdohnak ah minung thazaang in siseh, hriamnam thazaang in siseh an rup lo tuk caah zanlei suimilam 5 pm hrawng ah CDF phu fonh pawl nih Taingen khua in hnu an tolh tak hna. Cu ni nikhat chung kahdohnak ah SAC ralhrang 40 hrawng an thi i, hliamhma a tuarmi an tam tiah Local CDF phu nih thawngthanhnak an tuah.
Hiangzing raldohnak ahhin bomb puah ruangah Chin ralkap cheukhat hliamhma a tuar i, PDF – Zoland i Tg. Kap Suan Mung @ Mung No le CNA in Salai Cung Lian Sang nih ram le miphun caah an nunnak an pek. Kalay – Chin ramkulh kar motor lam cung ah a ummi Hiangzingkahdohnak ni 10 chung a um hnu, January 28 ni ah PDF – Zomi, People Defense Army, Civic Defense Miliatia le Zogam Army Tanti ralkapbuu (Allied Force) phu an ser i, hmunkhat tein ral kan doh ti lai tiah thawngthanhnak an tuah.
SAC ralhrang phu nih rampi nawlngeihnak an lak hnu ah Chinland Defense Force phu hna lei SAC ralhrang phu kar kahdohnak fah a chuakmi chungah 2021, December tiang SAC ralhrang 1029 an thi i, Chin ralkap phu fonh lei in pasaltha 58 nih ram le miphun ca an nunnak an pek tiah Chinland Joint Defense Committee nih thawngthanhnak a tuah. Credit: Chin World
Leave a Reply