Chin Ralkap Phu Fonh CJDC Ca Ah Save Myanmar USA Nih Phaisa Tampi A Hmuh Piak

Chin ramkulh chung i CDF le PDF phu phu 17 fonh in sermi Chinland Joint Defense Committee (CJDF) caah US Dollar 40000 leng kan kawl i kan hmuh tiah Save Myanmar USA nih thawngthanhnak an tuah. January 16 ni, Kawlram caan zinglei suimilam 8 ah National Unity Government (NUG) hruainak in Save Myanmar USA nih tuanvo an la I,

“Strategic Three-Point Online Fundraiser” tiah min pek in a voi 3 nak phaisa kawlnak tlamtling tein an tuah kho i, cu phaisa kawlnak ah NUG vuanci a simi Dr. Zaw Wai Soe le U Htin Linn hna zong an i tel kho i biachimhnak zong an ngei tiah theih a si. PDF – Zoland lei in Sayama Emma le Pu Dong Khup zong an i tel ve kho i, Sayama Emma nih lunglawmhnak bia chimhnak zong a ngei ve ti si.

Save Myanmar – USA cu ralram ah an nunnak pek in ral a dohmi Local PDF le CDF hna nih dohthlennak an tuahmi an tei khawhnak caah a biapi in bawmhchanhnak tuah ding in tuanvo latu an si i, NUG in vuanci hna le dohthlennak tuahtu hna caah dohthlennak a dih dongh tiang an si khawh tawk in bawmhnak tuah a timhmi phu an si.

Ram chung ram leng in a bawm kho mi hna nih bawmhnak an tuahmi a si i, atu “Strategic Three-Point Online Fundraiser” hi a voi 3nak an tuahmi a si cang i voi 3 fun kawlnak an tuahmi ah US dollar 120000 deng an hmuh cang tiah theih a si. Ref: KTM

Thawngpang dang: Thau khuami nih CNF/A ca ah $180,000 an pek: Global Thau Organization ” Ramdang um Thau khuami nih tulio CNF/A rianṭuannak ah Dollars 180,000 an thawh. USA, Columbus, OH ah USRC riantuantu upa hna nih an va hlam i, zan ah Hlasa nak le biatawi chimnak program zong sunglawi taktak in an tuah chih.

GTO riantuantu le Thau khua mi vialte hna nan tuan kawlholnak ah Bawipa nih a letzaa in thluachuahnak in pe cio ko hna seh. Credit: Chinland Club of USA