Chiphwe Ralzam pawl cu Pituhsit tuan lai an duh lo caah an umnak hmun ah kir an duh lo

Chiphwe Myo i ralzam hna cu an umnak ah kir an duh ngai cang, kir zong an timh cang nain Pituhsit a kan tuan ter lai tih an phang ngai tiah theih a si.

Chiphwe ralzam umnak hmun a um mi hna cu Gyaiklwe, Ritgyaw, Nabok khuami hna an si. Mah khua pawl hi Chiphwe he meng 8 hrong long a hlat mi a si i 2012 KIA le ralhrangbu an in kap lio ah a zam mi pawl an si.

Kir cu an duh ngai cang nain nan rak tlung ahcun dong khat pakhat pituhsit nan tuan lai tiin U Bawmlang hruaimi pituhsit pawl nih an ti caah an lung awtawm ngai tiah theih a si.
“Kan tlung a si ahcun dongkhat pakhat pituhsit nan tuan lai tiin an hruaitu nih a kan ti. Tlung kan duh ngai cang, kan tlung si ahcun pituhsit tuan le kan duh lo, kan tlung lo a si ahcun kanmah sungh a si hawi, kan in harh ngai” tiah ralzam pakhat nih a chimh.

Chiphwe, Sawlaw, Pangwa hrong hi thir an cawhnak hmun a si caah ralzam pawl hi an kir lo si ahcun an thlaicinnak hmunhma an sung dih lai an phang ngai.

“A bikin tlanglo thlawhin paw a cawm mi an si hna. An khua pawngkam ah thir an cawh tikah an tlung lo ahcun an vulei a tlau dih te lai, tlung i pituhsit tuan le an duh lo. An caah a har ngai” tiah khuami pakhat nih a ti.

Ralzam khua 3 lakah Gyaiklwe khua cu inn an sak dih cang, Ritgyaw le Nabok khua hna belte cu an sak lio a si caah Fur tlak tik lawng an kir khawh lai tiah theih a si.

The Chin Post