Emergency Thawngthanhnak An Tuah Hnu In A Thlalinak Thlakhat Chung Ah SAC Ralhrang 2000 Leng An Thi

National Unity Government cozah nih emergency thawngthanhnak an tuah hnu in a thlalinak thlakhat chung ah SAC ralhrang 2000 leng an thi tiah Delta News Agency nih a tarlangh. 2021 kum December 7 in 2022 kum January 7 tiang thlakhat chung ah SAC ralhrang 2377 an thi i, 605 nih hliamhma an tuar tiah January 9 ni ah PVTV nih thawngthanhnak a tuah ti si.

Hi hi cazin an tuak khawh tawk lawng a si i, a tak ralram ah hi nak tam deuh an thi kho ti zong in an langhter chih fawn. 2022 kum, January 1 ni in ni 7 ni tiang ah National Unity Government cozah nih thawngthanhnak a tuahmi ning in cun SAC ralhrang 392 nak tlawmlo an thi i, 99 nih hliamhma an tuar tiah tiah theih a si.

“Uico ralhrang pawl caah khuapi zong ralram a si cang. Khuate zong ralram a si thiamthiam. Cun khoika hmun an kal hmanh ah anmah cu mipi nih an huat i an fih i zei thawngpang hmanh theih loin mitcaw bantukin an kal caah Local PDF phu nih an bawh i bomb in an doh tawn hna. Cun Khuapi zong ah zeitik ah doh kan tong lai ti in thinphang thlalau in an um hna” tiah,

Yangon Southern District chung in Myopiah PDF pakhat nih a chim. National Unity Government nih People’s Ambrace ah i dornak program an tuah i Emergency thawngthanhnak an tuah hnu ah mipi sin raltha ngai in a dirmi CDM ralkap le CDM palek nihin an tam deuh deuh hna ti zong in theih a si. Ref: DNA

Thawngpang dang: Karen ramkulh, KNU Tatmaha 6 area, Lay Kay Kaw le Mehtaw Thalay peng ah SAC ralhrang phu nih khuami inn an baoh i an thilri pawl le cycle, motor, thilri man sung pawl an fir i nihin motor in an thial hna tiah theih Southern Command in U Ye Min (AAC) nih Yangon khit Thit Media ah a chim.

“Lay Kay Kaw le Mehtaw Thalay ah hin khuami an um ti lo. Cu tik ah uico ralhrang phu nih inn an baoh hna. Cycle, motor le thilri man sung pawl an fir i zan ah motor in an thial hna. An duh paoh in an um hna. Mehtaw Thalay ah cun bazaar hna, store dawr hna, phone dawr hna tampi an um i, atu cu an baoh i an fir dih cang” tiah U Ye Min nih a chim hi a si.

Cu lawng siloin kahdohnak a dai cang i ralzam hna an inn ah thilri a rak lami khuami cheukhat zong SAC ralhrang phu nih an tlaih i rawl an chumter hna, lam hruaitu ah an hmang hna pinah an hrem hna tiah theih a si. Ref: KTM