Federal Army Dirhnak Dingah Caan Tlawmpal Lak Rih A Hau: U Htin Lin Aung

April 16 ah CRPH nih cozah thar National Unity Government (NUG) cu tlamtling tein a vun ser cang. Cozah an ser cang caah um lo awk tha lo a simi cu cu cozah le mipi kilvengtu ralkap a si.Ralkap dirh ding hi CRPH nih a rak chim cang. Federal Army ti a si lai ti a si.

Cu Federal Army cu Myanmar mipi dihlak nih kan i hngahhlang tukmi a si. Caankarlak cozah an vun ser cang bantukin Federal Army dirh ding zong cu a herh tuk cangmi a si. Federal Army a dir ahcun ka lut lai tiin a hngakmi mino an tam tuk. Zeiruangah atu tiang a dir bal hnga lo tiin mi tampi nih kan cuanh cio. Hi Federal Army dirhnak kong he pehtlai in CRPH i ramkip biakchawnhnak lei tuanvo ngeitu U Htin Lin Aung nih cun caan tlawmpal lak rih a hau tiah a chim.

America a ummi Myanmar Democracy cawlcangtu hna he online meeting tuahnak ah U Htin Lin Aung nih cun “Atu cu cozah zong a hung dir cang i cozah tungtlang pakhat a simi ralkap dirh a hau cang. Kan dirh lai i kilvennak tuanvo an lak lai. Ralkap kan dirh hlan ah mah le mah kilvennak bu (PDF) kan tuah hmasa a hau. Mipi hi an lung a tho tuk i  bawmh an kan duh, i tel ve an duh ti kan theih. Ralkapbu pakhat dirh ding ahhin ningcang tein thok a hau. Daithlang in tuah awk a tha lo. Caan lak deuh a hau. Caan lak in tha tein kan dirh lawngah mipi a kilvengtu ralkapbu a si kho lai” tiah a chim.

Cu lawng si loin ramkip hmunkip ah a ummi Myanmar rammi hna nih CRPH ah bawmhnak an pekmi 9.2 million leng a si cang i cu chungin cheukhat cu CDM a tuahmi hna bawmhnak ah an hman. Cuti i CDM a tuahmi hna bamwhnak ah an hmanmi cu MAH ralhrang nih an kham, hnahnawhnak an pek lengmang hna tiah U Htin Lin Aung nih cun a chim.

“Over 9.2 Million bak a si, atu tiang kan hmuhmi ah mu! Cu tangka hna cu ပြည်သူ့ဂုဏ်ရည်အဖွဲ့ hruainak in an khawlhmi a si caah anmah bank ah a lut cang. Cu chungin CDM bamwhnak ah kan hmanmi a um. Cucu hnahnawhnak tampi kan tong. CDM tuah ruangah harnak a tongmi tampi an um. Din le ei, cun ngandamnak lei zongah! Cu bantuk caah cun bawmhnak pek kan duh hna. Asinain ralkap nih a phunphun in hnahnawhnak an kan pek peng”.

Suimilam pakhat le cheu chung online meeting ah America lawng si loin Canada, Italy le Myanmar ramchung lei in cheukkhat zong an i tel kho. An ceih bikmi cu April 16 ah sermi UNG nih hmailei ah zei bantuk zuamcawhnak dah a ton lai? Ramleng a ummi Myanmar rammi hna nih zeitindah bamwhnak an pek lai timi kong a si. Cred : Chin Post