Ralhrang mawtaw hna cu Kalay PDF nih bomb in an doh i ralhrang 8 an thi
Tuchun suimilam 12:00 hrawng ah mi sawhsawh mawtaw 3, saikel 5, thil phurh nak mawtaw 4 in Kalay lei ah a rak ra mi ralhrang mawtaw hna cu Chin Sine khua pawng ah PDF Kalay nih bomb in an doh hna i saikel 3 le mawtaw 1 cu an rawk i saikel a khaltu ralhrang 3 le thilphorh nak mawtaw a cit mi ralhrang 5 an thi an zapi minung 8 an thi .
Bombpuah hna hnu ah ralhrang hna cu Chin Sai lei cu tihphan bu in ruahdamh in an kah i bomb an puahnak in a rawk mi mawtaw cu an chiah tak i a dang mawtaw ah ruak hna cu an khin hna i Kalaymyo lei ah rang taktak in an zaam tiah Kalay PDF nih an thanh.
Relchap : Ralzaam hna thlopbul tu siibawi telin minung pathum ralhrang nih an tlaih hna
Sagaing ramthen ah ralzaam dirhmun in ummi hna thlopbul tu Kachin miphun Dr.Zaw Tway Aung tel in minung pathum cu ralhrang phu hna nih nizaan chunhnu ah an tlaih hna tiah anmah he naihniam mi hna nih an chim.
Mungyua, Chainmyawady ah Dr. Zaw Tway Awng nih rawldawr tuahnak ah ralhrang phu hna nih luhhnawh in Dr. Zaw Tway Aung le a dawr riantuan tu pahnih cu an tlaih hna.
“Inn a tin kar ak chun ah an tlaih hi a si, a dawr riantuan piak tu minung pahnih zong an tlaihchih hna” tiah Dr. Zaw Tway Aung chungkhar he naihniam mi hna nih an chim.
Dr.Zaw Tway Aung cu Chindwin Medical Network ah hmunkip kal in sii lei thlopbul tu a si, atu ah Yinmapin, Kanni peng ralzaam mi hna cu sii lei thlopbulnak a tuah piaktu hna a si.
Atu ah Dr. Zaw Tway Aung cu khoi ka hmun ahdah an kal pi ti theih a si rih lo.
The Chin Post
Leave a Reply