Myanmar ram chung buainak le kahnak a chuah hnu CDF-Hakha sin ah hriamnam he Civil Disobedience Movement (CDM) a tuah mi palek minung pahnih an um i, hriamnam he CDM a tuah mi pahnih hna cu lawmman laksawng sing 50 veve an pek hna tiah CDF-Hakha sin in thawng kan theih.
February 1 ah Myanmar ram uknak Min Aung Hlaing le a minung hna nih hramhram in uknak an laak hnu CDF-Hakha sin ah ralkap le palek CDM a tuah mi minung 100 leeng an um cang i, hi chung ah minung pahnih nih hriamnam he CDM an tuah tiah kan theih.
CDF-Hakha leikap zong nih 2021 September 16 ahkhan, CDM a tuah i Council zung lei he aa pehtlai mi thilri aa zaam pi kho mi poh tangka sing 50 siseh, tangka sing 100 siseh, pek si a si lai tiah cathanh an rak chuah bal.
CDF-Hakha lutlai pakhat nih, “Kan sin ah hriamnam he a rak zaam mi pahnih an um. Hriamnam he kan sin ah a zaam mi cu lawmman laksawng tangka fang in pek ding tiah cathanh kan rak chuah bantuk in an pahnih tein kan pek veve hna,” tiah The Hakha Post ah a chim.
2021 September 16 i cathanh an chuah mi chung ah, “Ralkap lei in siseh, palek lei in siseh, zung lei in siseh CDM a tuah mi hna cu nan thutdirnak siseh, nan eidin lei siseh kan in rin dih hna lai. Meithal le meithal kuan aa ken mi poh tangka sing 50, Hriamnam ngan le a kuan pawl nan i ken khawh ahcun sing 100, Mizapi ta a si mi zung motor nan i zaam pi khawh ahcun sing 50,” kan in pek hna lai tiah aa tel.
CDF-Hakha sin ah palek le ralkap a zaam mi hi Chin miphun lawng si loin, kawlrawn lei in a zaam mi le miphun dang zong an um pah tiah theih a si.
The Hakha Post
Leave a Reply