Hmandaw Khuami “Salai Cung Chin Thang” a Pu Ruak a Tlunpinak Lampi ah SAC Ralhrang nih an Tlaih

Civil Engineering (BE) in Degree a la cangmi Hmandaw khuami Salai Cung Chin Thang cu nihin chun ah Kalay sizung ah a nunnak a liammi a pu ruak khua lei a tlunpinak lampi, Kapany hlei pawng Check Point ah SAC ralhrang nih an tlaih, tiah thawng kan theih.

Khuami pakhat nih, “A pu ruak a phormi motor hmai ah anih hi motorcycle in a kal. Hmandaw phak hlan Kapany hlei pawng Check Point ah PDF he pehtlaihnak a ngei lai tiah lunghrinh in ralkap nih an tlaih,” tiah a chim.

Salai Cung Chin Thang an tlaih lio a hmutu khuami pakhat nih, “An tlaih i an velhnak thawngpang hi lamhlatpi hmanh in kan theih. An thlah tiang kan hngah lai kan ti nain ralkap bawi pakhat nih hngak hlah u. Nan caan lam a paam. Kan checkhlat dih in kan thlah ko lai a kan ti. Salai Cung Chin Sang i a Hmatlungtin (ID) le tangka bawm a kan pek i a kan kalter,” tiah a chim.

Salai Cung Chin Thang hi atulio hriamtlaih cawlcanghnak zong aa tel lomi a si i, khua ah chungkhar he a ummi a si.

A pu ruak tu cu inn ah a phan cang nain amah belte atu tiang inn a hlam rih lo, tiah khuami hna nih an chim.

The Chin Journal