Hnankha(ႏွမ္းခါး) khua cu ralhrang phu hna le pyusawthi phu hna nih meikhangh in an hrawh

Magway ramthen,Gangaw peng, Gangaw-Kalay motor lampi ah ummi Hnankha khua cu September 13, zinglei ah ralhrang phu hna le, pyusawthi phu hna nih mei in an khangh.Hnankha khua cu inn za reng lo umnak khua pakhat a si.

“Cu hlan zong ah Myinta ,Ta lyin hna cu mei in an khangh hnu an kir lei ah Hnankha khua cu lut in, inn tha le inn ngan thim in inn 30 leng mei in an khangh cang, a tu ah hin inn thum tiah kan theih, ralhrang thil thuam hruk in pyusawthi phu zong an i tel. Nizaan zong Bin(ဘင္း) ah mei an khangh cang.Kanmah lei hriam tling kan ngeih lo caah,zoh sawh in kan zoh ko hna” tiah Yaw mipi vengtu phu chung in pakhat nih a chim.

Gangaw peng thlanglei Myinta, Kungkhua, Ta Lyin, Hnankha, Thae Hlaw(ဘင္း) khua zarhkhat chungah inn khanghmi 100 hrawng an si.Kum-18 tang ngakchia tel in sualnak ngeilo mipi minung 20 leng zong nawlngeihnak la tu ralhrang phu hna nih hramhram in an thah hna.

“Kan khua, kan hmunhma cu mah le thazaang bochan in kan ngeihmi hriam he kan ven. A tu lio ah kan herhbik cu hriam thilri hi a si ko, hriam cawknak hi kan herh bik ko.Mipi hna le khuami hna zong nih kan tanpi ko uh.EAO zong nih a herh mi ah bawmchan kho ding in bawmhnak hal kan duh ko. A thiang i a dai mi hmun Yaw ah hin thisen tamtuk a luang cang” tiah Yaw mipi vengtu ralkap chungtel pakhat nih a chim.

Ralhrang phu hna nih Yaw hmunhma ah minung tha zaang chap nak an tuah thawngdik lo zong an langhter. A tu lio ah mipi hna nih Kalay-Gangaw lam ah khualtlawn hrial ding in mipi vengtu ralkap phu hna nih theihter nak an tuah.

The Chin Post