HRC Nih Kawlram Ralzaam Hna Tlaih Lo ding India A Nawl

HRC Nih Kawlram Ralzaam Hna Tlaih Lo ding India A Nawl India ramah i dornak an hal lio tlaihmi Kawlram mi vialte thlah colh dingin Human Rights Council nih India cozah sin ah July 28 ah a nawl.

Cu lawng si loin Kawlram in Manipur state ah a zaam mi, India nawlngeitu hna nih an tlaih i, kan hnu June thla ah covid-19 zawtnak in a nunnak a liam mi nu 2 hna konglam cu India nawlngeitu hna nih hlathlainak tuah dingin HRC nih a nawl.

Ralhrangbu nih uknak a lak hnu ah ralhrangbu uknak a duhlo mi le a dohtu hna tampi cu himnak kawlin India lei ah an zaam hna.India ah a zaam mi hna hi 16000 hrawng an si lai tiah HRC nih a chim.

India lei a rak zaam mi hna hi MP, CDM a lut mi cozah riantuan hna, ralkap, palek, meithat le nuhrin covo lei cawlcanghtu hna, CSO riantuan hna le rian phunphun a tuanmi hna an si.

Mah ralzaam hna hi a bikin Kawlram ramri he a naih mi Manipur, Mizoram, Nagaland le Arunachal Pradesh state 4 an phan hna tiah India media pawl nih an chim.

Ralzaam cheukhat hna cu India cozah nawlngeitu hna nih phungninglo in ramchungah a lut mi an si tiin an tlaih hna mi cungah HRC nih forhfialnak a tuah mi hi a si.

Kan hnu June thla ah Manipur state ah an tlaihmi nu 2 hna cu covid-19 zawtnak ruangah sii inn ah an nunnak a liam.Cucaah, an tlaih mi hna hi zeitindah an zohkhenh hna tiin HRC nih biahalnak an tuah mi a si.

HRC nih India cozah cu ralzaam kong he pehtlaih in vawleicung zulhphung ningin UN agency hna he venhimnak pek dingin HRC south Asia regional head Minashi Ganguli nih a nawl.

A bikin an tlaih mi hna an hrennak hmun ah covid-19 zawtnak a chawn mi cungah kan thin a phan ngai.Manipur ah i dornak nawl a hal lio mi 13 hna sin in covid-19 zawtnak an i chawn cang tiah HRC nih a chim tiah BBC nih a langhter.

The Chin Post