Israel le Hamas te cu Ni 11 chung an in kap hnuah Tuzing zingka te ah khan kahdaihnak an tuah khawh cang. Ni 11 chung an in kah nak ah Minung 240 leng an thi tiah theih a si.
Israel Political Security Cabinet nih “Kahdaihnak tuah dingah kap hnih nih lungrual tein kan pawm, ramkhel kongah thil a cang tak tak mi nih fiahnak a tuah te lai” tiah a ti.
Israel ramvennak vuanci Benny Gantz nihcun “Gaza thil tuah mi nih Israel ralkap caah kan tong bal lo mi hlawkna a kan pek” tiah a tweet.
Kan hnu May thla ni 10 in a thawk mi Israel le Hamas pawl buainak ni 11 chungah Gaza ah Nu le hngakchia 100 tel in a tlawm bik minung 232 an thi tiah Hamas Ngandamnak vuanci nih a chimh. Israel nihcun Hamas pawl 150 hrong an thi tiah a chimh nain, Hamas lei nih an ralkap a thi mi kongah zeihmanh thanhnak a ngei lo.
Israel nihcun kan mah lei ah Rocket 4000 leng an kah, hngakchia tel in Minung 12 kan thi tiah sii lei riantuan pawl nih an chimh.
A tubantuk kahdaihnak a um khawh nak dangah Egypt, Qatar le UN hna cu tlangtlak tu bik an si. US president Joe Biden zong nih Israel Prime Minister Benjamin Natanyanhu cu kahdaihnak tuah dingah a lungput cu fakpiin thumh dingah a nawl ve tiah theih a si.
Kahdaihnak an thanh hnu tlawmpal ah Palestinain pawl cu lam ah an chuah. An biakinn in “kan tei cang” tiah thang tak takin an au len ve.
Hamas Council on International Ralation chungtel Basem Naim nihcun “kahdaihnak kong he pehtlaihin ka zum tuk rih lo. Palestinian ah dinnak um lo in Israel nih a kan kah mi le Jeruslem i kan mipi cungah Israel sualnak vialte a dai hlan chung cu kahdaihnak zong a fek lai lo” tiin BBC ah a chimh.
Credit The Chin Post
Leave a Reply