Japan Nih SAC Sinah Ral Hriamnam Zuarh Ti Lo Dingin Biachahnak A Tuah Cang

Myanmar ralkap (SAC) sinah ral hriamnam le ral hriam he aa pehtlaimi thil zeihmanh zuarh ti lo ding, asiloah pekchanh ti lo ding le fimthiamnak lei zongin bawmhnak le tuantinak tuah ti lo dingin G7 ram pakhat a simi Japan nih biachahnak a tuah cang. London i tuahmi G7 ramleng vuanci hna meeting cathanh ah atu bantukin Janpan nih min a thut vemi a si.

Hihi SAC sinah ral hriamnam zuarh lo dingin Japan nih biachahnak a tuah i mipi theih in a phuannak le biakam a tuah a voikhatnak a si.Ralkap nih nawlngeihnak an lak hnu thlakhat, March thla i UN nih Myanmar ram nuhrin covo kong i a thlahmi palai Tom Adrews nih SAC sinah ral hriamnam zuarhnak a phitmi ram cazin a thanhmi ah Japan a rak i tel lo.

UN SC nih vawleicung huap in Myanmar ralkap sinah ral hriamnam zuarh khamnak cathanh chuah dingin zatlangbu 200 renglo nih May 4 (nithum ni) ah halnak cathanh an chuah tlawmpal ah atu bantukin G7 ram hna nih cathanh an chuah ve hi a si.

SAC sinah ral hriamnam zuarh khamnak a tuahmi ram hi 43 an si cang i ASEA in Japan le South Korea an i tel. Hnulei tuanbia kan zoh tikah South Korea le Japan hi Myanmar khongton uktu ralkap hna dantatnak le phihkharnak a tuah bal lomi ram an si.crd:VOA