Kani Peng Ah Khah-Lah-Yiah 2 In A Zaammi Rallokap Pakhat Sui Le Ngun He An Tlaih Sagaing ramthen Kani peng ah hmai a kal mi rallokap i Tatmah 44 kuttang Khah-Lah-Yiah 2 in a tli mi pakhat cu sui le ngun thilri he July 16 zaanlei ah tlaih a si.
Hi Rallokap hi Minkin peng (မင္းကင္းၿမိဳ့နယ္) Mohkataw khua in a rak tli mi a si tiah mipi ralkap huaitu pakhat nih a chim.Khua mi mipi nih thawng an kan thanhnak ahcun rallokap pakhat a tli mi kan tlaih.Kan tlaih hnu in kan check hnu ah rallokap phu 44 phu in a ra mi a si ti kan hngalh. Sui le ngun sing 7 hrawng he a si .Thilri pawl cu Ban hrolh, Thi 2,Thi lep an si.
Kan tlaih mi rallokap pa hi nai hrawng ah khan Kani peng Zinnkhua ah sualnak ngei lo mipi minung 16 cu a tlaih hna i a thah hna i an sui le an ngun a lak piak tu rallokap pawl ah khan pakhat a si tiah Zinn khua mi hna nih an chim.An tlaih mi pa tu nih cun kei cu khua mi a that mi pawl ah khan cun kaa tel lo tiah a chim.
Rallokap ka luhnak hi Training kai nak No 1/2019 ah ka kai.Atu hi kei cu tatzin 44 ka si. Kanmah Tatzin 44 hi Kani peng le Minkin peng ah tiah kan i then.Sualnak ngei lo mipi cu kan tlaih hna i bia kan hal hna kan tuk kan velh kan thah hna. July 9 Kani peng Zinnkhua ah sualnak ngei lo mipi minung 17 cu a ruang um lo in kan thah hna.Asinain kei cu a hmai lei ah hmunhma ka lak i mah minung 17 thahnak hin cun ka tel lo.An kahnak meithal thawng tu cu ka theih ko tiah a chim.
2020 September thla thok in hmailei ah ka kal peng i inn zong ka tlung kho ti lo ti nak kong le ka chungkhar he nuam te in um i tuan ei ti ka duhtuk cang caah rallokap ah hin ka tliknak a si tiah a chim.
Abik in mipi thah le thah lo nak kong hi cu kan ralbawi pa nawlchuah mi a si. Keimah duhnak in cun sualnak ngei lo mipi thah hi cu tuah ter ka duh bak lo.Mah hi nifatin ka hmuh caah rallokap in ka chuahnak hi a si tiah a chim chap.
Kani mipi vengtu phu hna nih tu an tlaih mi pa cu himnak le tha tein an chiah i ka khua ah tlun ka duh a ti caah kan tlunter lai tiah mipi vengtu phu hruaitu nihcun a chim.
Kani peng chungah rallokap pawl nih uknak tha lo a do mi mipi le khuami pawl cu an tlaih hna i an hrem hna an thah hna i an thilri an lak piak hna.
The Chin Post
Leave a Reply