Kawlram Buainak ASEAN Nih Tlangtlak Dingin India Nih A Cohlan

Kawlram Buainak ASEAN Nih Tlangtlak Dingin India Nih A Cohlan Kawlram kongah ASEAN special envoy Erywan Yusof le India foreign minister Dr. S. Jaishankar hna pahnih an i chawnhnak kong he pehltaih in India foreign minister nih Kawlram kong ASEAN tlangtlaknak cu India nih kan lungtlin pi i thazaang kan pek .

Kawlram buainak tawlrel dingin ASEAN nih rian khinh mi Dato Erywan Yusof cu atu hrawngah pawngkam ram hna le hawikom ram ramdang vuanci hna sin ah ruahnak lak dingin pehtlaihnak a tuah cuahmah lio a si.

Tukum June thla 28 ah tuahmi UN general assembly ah ralhrangbu sin ah hriamnam zuar lo ding kongah biachahnak tuah lio ah India cu Vote a pe lo mi ram a si caah ramkhel kong a hlathlaitu cheukhat hna nih ralhrangbu cung i India lungput cungah lung si lo nak a um.

India nih a ramchung north-east state hriamtlaibu hna kong he pehtlaih in ralhrangbu he pehtlaihnak ngeih hi an herh ngai mi thil pakhat a si.Mah lawng si loin India nih nichuahlei ram hna he i pehtlaihnak le chawlehnak caah kum 30 deng a rak kalpi cang mi ‘Look East/Act East Policy’ ruangah Kawlram cu an caah a biapi ngai mi ram pakhat a si.

Atu ah India nichuahlei Kolkata sea port le Kawlram nitlak lei Sittwe sea port pehtlaihnak KMMTT project le Moreh in Mandaly – Thailand pehtlaihnak highway project hna cu India caah a biapi tuk mi a si caah India nih ralhrangbu cawlcanghnak kong he pehtlaih in a hak mi policy a ngei kho lai lo tiah ruah a si.

India cozah nih mah project – 2 hna hi tuan ah dih a duh caah ralhrangbu cu a tunai ah mah project tuan ah dih dingin a chawnh tiah theih a si.

UN special envoy for Myanmar Chritine Schraner Burgener nihcun Kawlram kong he pehtlaih in ramdang zohtu phu dirh ding le India cu chungtel si ve dingin a duh tiah a chim.

The Chin Post