Myanmar – Thailand ramri, Karen ramkulh telh in ramkulh le ramthen dangdang in Myawaddy myo, Thaungyi tiva tan in Thailand ram chung ah phung ning loin a lutmi hna tlaih khawh ding in February 2 ni ah Thailand Security Force phu nih rang cit in training an tuah tiah theih a si. DVB nih a tarlangh.
Thailand Rang ralkap hna cu phung ning lo in an ram chung a lut dingmi pawl, ritthaisii a phurtu pawl le phung ning lei in hriamnam a phurtu pawl an kham hna lai tiah theih a si. Kawlram chung SAC ralhrang nih hramhram in nawlngeihnak a lak ruangah rian a har i, chungkhar pawcawmnak a harsa tuk cang caah,
Thailand ram ah riantuan in minung pakhat ah Thai Baht 20000 in 25000 tiang pek in an lut cio i, nifatin ti awk in Thailand Security Force phu nih an tlaih peng ve hna tiah theih a si. Nikhat ah 100 leng an tlaih caan zong a um i, voikhat an tlaih ahhin a phuphu lawngte in an tlaih tawn hna ti si. Kawlram mipi cu MAH ruangah a zeilei paoh in harnak kan tong lio a si.
Nai January 30 ni, zinglei sumilam 3:30am hrawng ah Myanmar – Thai ram in in Thailand ram chung ah athli tein a lutmi Kawlrammi minung 48 le Thailand mi puaisa 3 hna zong Thailand ralkap nih an tlaih rih hna. Anmah cu Karen ramkulh, Myawaddy khuapi in thlanglei Kyaukkhe lei mi deuh an si i, Thailand ram, Tag District, Phupara khuapi an phan lio ah Thailand ralkap nih an tlaih hi a si.
MAH phu nih hramhram in nawlngeihnak an lak hnu 2021 kum, December 28 ni zong ah Kawlrammi Thailand ram ah phung ning loin a lutmi minung 13 cu Myawaddy khuapi in chaklei meng 10 a hlatnak, Thailand ram, ram lak hmun pakhat ah i an i thupnak ah Thailand ramri Security Force phu nih an rak tlaih hna.
Anmah cu Thai upadi ning in dantatnak kan tuah lai ti si. Cu bantukin Kawlrammi nih phung ning loin Thailand ram an lut peng caah tu bantuk an ram a him deuhnak caah Kawlrammi tlaih ding bak in rang ralkap pawl training an tuahter hi a si. Ref: DVB
Leave a Reply