Khah! CDF Mindat Nih Nihin An Raldohnak Thawngthanhnak An Tuah Cang Hi

February 4, 2022: Mindat – Matupi lam ah CDF – Mindat le SAC ralhrang phu kar kahdohnak ah SAC ralhrang 7 hrawng an thi tiah theih a si. CDF – Mindat paraltha hna nih Matupi in Mindat lei a rak rami SAC ralhrang tamtak cu um kal thiam loin an phomh peng hna i, 10 chung ah ralhrang an thahmi zong a tam ngai cang hna.

Thil sining cu Chin ramkulh, Mindat myone ah nihin February 4 ni, chun suimilam 2 pm thok in Mindat – Matupi lam ah SAC ralhrang phu le CDF Mindat phu kar kahdohnak a chuak i, SAC ralhrang phu lei in ralhrang 7 hrawng cu thuhnawh dohnak le bomb puah hnawh ruangah an thi tiah CDF – Mindat chimhnak nawlngeitu Salai Yaw Mang nih a chim.

“Mengtung 19nak le 20 nak kar ah kahdohnak a chuak. Kanmah lei phu nih a thlithup in a dohmi a si. Cu ti a thlithup in an doh tikah 3/ 4 an thi. Bomb nih a puah hnawh ruangah an dihlak 7 hrawng cu a tlawmbik an thi lai. Hliamhma a tuarmi zong an tam” tiah CDF – Mindat in chimhnak nawlngeitu Salai Yaw Mang nih a chim.

Kan hnu January 24 ni ah Matupi khua in Mindat khua lei ah ralrang  motor 90 he a rak kirmi SAC ralhrang phu le CDF – Mindat hna cu February thla thok in Mindat – Matupi lam, Mengtung 32nak, Mengtung 28nak hna ah kahdohnak a chuak i, nihin chun zong ah Mengtung 20nak hrawnghrang ah kahdohnak a chuak than hi a si.

Cu kahdohnak ah SAC ralhrang phu lei nih hriamnam ngan phunphun telh in Tank motor he tiah voi 50 hrawng an kah pinah Mindat khua chungah a ummi ralhrang 274 Tatzing lei zong nih seh-meithal (motor meithal) in an kah bawmh hna tiah theih a si. Matupi in Mindat lei a rak rami SAC ralhrang phu pawl hi lamtamtim ah 10 leng an rau cang ti si.

Mindat Myone People’s Administration phu nih thawngthanhnak an tuah ning ah zanlei suimilam 5pm leng ah SAC ralhrang phu pawl cu Mindat – Matupi lam, mengtung 18nak hrawnghrang ah an um lio tiah theih a si. Ref: Khonumthung Burmese