Chin National Organization/ Chin National Defense Force (CNO/CNDF) nih tu kum 2022, January thla thlakhat chung an raldohnak thawngthanhnak an tuah. An thawngthanhmi ah January thla chung ah SAC ralhrang phu le CNDF phu kar kahdohnak voi 12 a chuk i cu kahdohnak vialte chung ah SAC ralhrang phu lei in a thimi 81 an si tiah an langhter.
Cun cu vialte kahdohnak chung ah SAC ralhrang phu lei in hliamhma a tuarmi hi a tlawmbik 60 leng an si lai ti si. Tu kum January thla chung kahdohnak hi January 12 ni in aa thok i, SAC ralhrang phu thazaang 300 hrawng Chin ramkulh, Falam peng lei a rak kaimi hna he i kah a si tiah an thawngthanhnak ah an langhter. Atanglei hi an thawngthanhnak aa tlak ning in leh chinmi a si.
2022 kum, January thla chung kahdohnak kong thawngthanhnak: 2022 kum, January 1 ni in 31 ni tiang, thlakhat chung ah Chin ramkulh Falam peng, hmunhma cheukhat ah SAC ralhrang phu le Chin National Defense Force phu kar kahdohnak voi 12 a chuak. January 6 ni thok in SAC ralhrang phu minung thazaang 300 hrawng nih offensive in an kan doh i kanmah CNDF ralkap phu lei in mah ivennak ah kan doh ve hna.
Cu kahdohnak vialte chung ah SAC ralhrang phu lei in a thimi dihlak 81 an si i, hliamhma a tuarmi hi a tlawmbik 60 leng an si. Kahdohnak a chuahnak pawngkam, hmunhma 8 hrwang ah SAC ralhrang phu a thimi pawl ruak an pumhmi kan hmuh i, kanmah CNDF lei nih 60 MM, 40 MM le meithal kuan tampi kan lak khawh hna.
Kanmah CNDF lei in bomb thianhnak kan tuah lio ah hliamhma a tuarmi pasaltha 1 telh in kahdohnak chung ah hliamhma a tuarmi dihlai minung 8 an si i, CNDF pasaltha 1 nih ram le miphun ca a nunnak a pek. Information and Public Relations Department, Chin National Organization. Laknak: Chin National Organization
Leave a Reply