Khuapi Chung Kan Kah Cang Lai Caah A Himnak Hmun Ah Zam Rih U Ti A Si Cang

Karenni ramkulh, Loikaw khuapi le a  pawngkam hrawnghrang ah kahdohnak an tuah cang lai caah khuami mipi hna cu a himnak hmun ah i thial ding in Karenni Democratic Force (KDF) phu nih an mipi an forh hna tiah theih a si. Tu kar hrawng hi Loikaw khuapi chung le Demawso, Dawngankha, 6 Mile hna ah ni chiar ti awk in kahdohnak a chuak i,

SAC ralhrang phu lei nih vanlawng in bomb an thlak hna pinah hriamnam ngan in an kah i an doh hna tiah theih a si. Tu lio cu Karenni ramkulh hi SAC ralhrang phu nih biatak tein an dohnak ramkulh a si i, ralhrang thazaang tampi hi, cunglei vanlawng tiang in a hmang ko nain a tei khawh ti hna lo caah MAH nih kahdaihnak ser ding in a sawm hna timi thawngpang zong a len.

“Khuapi chung kahdohnak kan tuah ahcun khuami mipi hna kar ka lak um bantukin an si lai caah a himnak hmun ah i thial chun ding in kan nawl hna. Kanmah nih cun a si khawh chung in mipi kan veng lai bantukin, SAC ralhrang phu a bawmtu paohpaoh cu kan doh cang hna lai” tiah KDF in tuanvo ngeitu pakhat nih a chim.

Kap hnih kar kahdohnak chung ah SAC ralhrang phu lei nih vanlawng le hriamnam ngan an hmang caah zarhkhat chung ah khuami 15 nak tlawmlo an nunnak a liam tiah KDF lei nih an chim chap. Nihin hmanh ah Loikaw khuapi, Daw u khu sang phungki sianginn hnulei ah a ummi U Pyone Cho timi pa le U Min Htwe timi pa hna cu,

SAC ralhrang phu hna nih an kah i an nunnak a liam tiah theih a si. Tu kum January thla thok in Loikaw khuapi telh in Karenni ramkulh chung kahdohnak a fah deuhdeuh caah khuami a thongthong in an inn le lo an chuak tak i a himnak hmun ah an zam hna ti si. Tu kar cu Karenni mipi ralkap an hong thawng ngai hna i uar an um ngai hna. Ref: Khit Thit Media