KNU Chairman Cathanh Cu European Karen Network Nih An Cohlang Lo

Atulio KNU Chairman a simi Saw Mutu Say Poe nih cathanh a chuahmi cu European Karen Network nih cohlan khawh a si lo tiah May 10 ah cathanh chuah in lehnak an tuah colh.

KNU Chairman Saw Mutu Say Poe nih cun NCA zulhphung ningin kan zulh lai a ti pinah ramkhel buainak hi hriamtlaih in tuahremh si loin cabuai cung biaruahnak in kan tuahremh a hau tiah cathanh a chuah.

Hi KNU Chairman cathanh kongah European Karen Network nih KNU Seal aa tel lo caah hi cathanh hi mi pakhat ruahnak lawng a si tiah an cathanh ah an tial. Hi cathanh hi kan cohlan lo lawng a si lo, kan lung a rawk chih tiah EKN nih an thanh.

Cu lawng si loin European Karen Network cu mipi lei ah kan dir peng lai. Mipi cungah a dik loning in a tuahmi cu kan doh lai tiah an cathanh ah cun an tialchih.

Tlangcung hriamtlaibu vialte le rammi vialte nih ralkap thalo hna dohnak le hrawhnak dingah an i zuam cuahmah lioah atu bantuin KNU Chairman nih cathanh a chuah cu khuaruahhar a si ko.

KNU ruahnak le duhnak maw a si, amah pumpak ruahnak le duhnak lawng dah a si? Amah pumpak ruahnak lawng a si ahcun KNU Chairman in ngolter ding. hrimhrim a si. Hi bantuk ruahnak a ngeimi nih cun duhsah tein a hruaimi vialte a hrawh dih hna lai.

Credit The Chin Post