VIDEO: Ralhrang Nih Ko Chan Tha An Thah Ning Cu A Fak Ko E

February 3, 2022: Ralhrang Nih Ko Chan Tha An Thah Ning Cu A Fak Ko E: Sagaing ramthen, Kani myone, Kinsanpiah khua ah hmunhma a khuarmi SAC ralhrang phu nih February 1 ni ahkhan kum 25 minung Ko Sin Paok @ Ko Chan Tha cu a hrawm an hlep i an thah hnu ah a ruak cu Chindwin tiva chung ah an hlawnh tiah Local PDF a simi Independence Army – IA phu sin in theih a si.

Ko Chan Tha a thahtu SAC ralhrang phu hna nih hin Kinsanpiah khuami 7 cu January 31 ni ah a ruang um loin an tlaih i February 1 ni ah Ko Chan Tha ruak cu Chindwin tiva chung ah Local PDF phu nih an hmuh hi a si. Cu SAC ralhrang phu thiamthiam nih khuami pakhat an thah rih i a thi cang tiah an ruah hnu ah tiva chung an hlawnh nain Local PDF phu nih an hmuh i a nunnak an khamh than manh ti si.

SAC ralhrang nih an hrawm an hlepmi Ko Chan Tha ruak cu hrintu a nu duh ning tein an charnak tiva in Kinsanpiak khua ah Tanti ralkap phu (Allied Forces) a simi Independence Army- IA le ChinDwin Young Heroes – CDYH phu nih an kalpi i tha tein mei an khangh piak tiah theih a si. VIDEO ZOHNAK  hi hmeh law, Ko Chan Tha ruak an char lio, hrintu nu a celh lo ning te pawl video ah zoh chih khawh a si. Ref; KTM

Thawngpang dang: Mandalay khuapi, Aung Mya Tharsan myone, Sang zung cheukhat ah bomb a puak tiah khuami sin in theih a si. Nizan February 2, zinglei suimilam 5 hrawng ah Aungmya Tharsan myone, Pale Ngweyaung sang zung ah bomb a puak i hliamhma tuar cu an um lo tiah khuami cheukhat chimhnak in theih a si. Cu pinah, zanlei suimilam 4 le cheu hrawng ah,

Aungmya Tharsan mhone, 81 lam, 23×24 lam kar, Pyigyi Kyatthayi hmai sang zung ah bomb a puak rih i hliamhma tuar an um le um lo theih a si rih lo. Pale Ngweyaung ahcun hliamhma tuarmi an um tiah a  pawngkam ummi hna nih an chim. Pyigyi Kyatthayi ahhin cun hliamtuar an um le um lo kan thei rih lo. Bomb a puah hnu ah meithal an kah thawng kan theih i,

Ahohmanh nih an va zoh ngam ti lo” tiah khuami pakhat nih Lu Nge Khit Media ah a chim hi a si. Nai January 29 ni zong ah Aungmya Tharsan myone sang zung ah nu 2 nih bomb an cheh i SAC ralhrang phu senthum pakhat telh in 3 nih hliamhma an rak tuar tiah theih a si. Ref: LNK